Menya Impamvu Ushobora Kumva Ushaka Kuruma Cyangwa Gukanda Umuntu Ukunda

Hari igihe umuntu areba uwo akunda cyane, yaba umukunzi, umwana cyangwa inshuti ye, akumva ashaka kumuhobera cyane, kumuruma buhoro cyangwa kumukanda amatama. Nubwo bamwe babyibazaho, abahanga bavuga ko ibi ari ibintu bisanzwe biterwa n’imikorere y’ubwonko.

Iyi myitwarire izwi muri siyansi nka “cute aggression” cyangwa “dimorphous expression.” Abashakashatsi bavuga ko ibaho igihe umuntu afite ibyishimo cyangwa urukundo byinshi cyane ku buryo ubwonko bugorwa no kubyakira icyarimwe.

Uko ubwonko bubitera

Iyo umuntu abonye ikintu cyangwa umuntu amukunda cyane, ubwonko busohora umusemburo wa dopamine, uzwiho gutera ibyishimo n’umunezero.

Iyo uwo munezero ubaye mwinshi cyane, ubwonko bushobora kugorwa no kuwugenzura neza. Kugira ngo busubize amarangamutima ku rugero rusanzwe, bushobora gusohora undi musemburo witwa adrenaline, ufitanye isano n’imbaraga cyangwa uburakari.

Uku kuvanga amarangamutima y’urukundo n’izo mbaraga ni byo bituma umuntu yumva ashaka gukora ibintu nko:

• kuruma buhoro uwo akunda
• gukanda amatama y’umwana
• cyangwa guhoberana cyane

Si ikibazo cyo mu mutwe

Abahanga bavuga ko ibi atari uburwayi cyangwa ikibazo cyo mu mutwe. Ahubwo ni uburyo ubwonko bukoresha kugira ngo bugabanye uburemere bw’amarangamutima akomeye cyane.

Ni yo mpamvu abantu benshi bavuga ko iyo babonye uruhinja rwiza cyangwa umuntu bakunda cyane bumva bashaka “kumurya” kubera uburyo bamukunze.

Ibyo ubushakashatsi bwerekana

Ubushakashatsi bwagaragaje ko abantu bagaragaza “cute aggression” akenshi baba bafite ubushobozi bwo kugenzura neza amarangamutima yabo nyuma y’igihe gito.

Ibi byerekana ko ubwonko bugerageza gushyira ibintu ku rugero kugira ngo umuntu adaterwa n’amarangamutima arenze urugero.