Umusore uri mu kigero cy’imyaka 25 y’amavuko yapfuye azize umuriro w’amashanyarazi ubwo yageragezaga kwiba insinga z’amashanyarazi mu Murenge wa Gisenyi, mu Karere ka Rubavu.
Ibi byabaye mu gitondo cyo kuri uyu wa Gatatu, tariki ya 9 Nzeri 2026, ahagana saa moya za mu gitondo, mu Kagari ka Kivumu, Umudugudu w’Itangazamakuru.
Amakuru dukesha IGIHE agaragaza ko byamenyekanye nyuma y’uko umwe mu baturage yahamagaye inzego z’umutekano atanga amakuru avuga ko insinga z’amashanyarazi zari ziri kwaka.
Polisi yahise itabara, maze ihagera isanga atari insinga gusa zari zafashwe n’inkongi y’umuriro, ahubwo hari n’umuntu wari hafi yazo wari umaze gufatwa n’amashanyarazi.
Umuvugizi wa Polisi mu Ntara y’Iburengerazuba, SP Sylvestre Twajamahoro, yavuze ko uyu musore yari amaze gushishura insinga z’amashanyarazi zingana na metero 25 ubwo umuriro wamufataga.
Yagize ati: “Polisi yahise isaba REG guhagarika amashanyarazi kugira ngo abari bagiye gutabara babashe kwegera aho uyu musore yari ari mu mutekano”.
Uyu musore ntiyabashije kurokoka, kuko umuriro w’amashanyarazi wamuhitanye.
SP Twajamahoro yavuze ko iki gikorwa cyari gifite ingaruka zikomeye, kuko kwiba insinga z’amashanyarazi bidashyira mu kaga gusa umuntu ubikora, ahubwo bishobora no guteza ibibazo bikomeye ku baturage benshi.
Yagaragaje ko kwangiza insinga z’amashanyarazi bishobora gutuma amashanyarazi acika mu bice binini, bikabangamira ibikorwa by’abaturage, ibigo, ubucuruzi ndetse n’izindi serivisi zishingiye ku mashanyarazi.
Mu byabereye i Gisenyi, Polisi yavuze ko kwibwa kw’izi nsinga byagize ingaruka ku muriro w’amashanyarazi mu mujyi wa Gisenyi.
Umuvugizi wa Polisi kandi yavuze ko uko aho byabereye hari hameze bituma bakeka ko uyu musore ashobora kuba atakoraga ubu bujura wenyine.
Yasabye abantu bose bakomeje kwishora mu bikorwa byo kwiba ibikoresho by’amashanyarazi kubireka, kuko bishobora kubaviramo gukomereka cyangwa gupfa, nk’uko byagenze kuri uyu musore.
Polisi kandi yavuze ko hari abantu bagura insinga n’ibindi bikoresho byibwe ku bikorwaremezo, bikaba ari byo bituma ubu bujura bukomeza.
SP Twajamahoro yavuze ko abaguzi b’izi nsinga biganje muri Repubulika Iharanira Demokarasi ya Congo, ariko ko hari n’abantu bake mu Rwanda bakomeje kubigura.
Yibukije abacuruzi b’ibikoresho bishobora kuba byibwe ko bafite inshingano yo kumenya aho ibyo bikoresho byaturutse mbere yo kubigura.
Abacuruza ibikoresho nk’ibi kandi basabwa kugira ibitabo bandikamo amakuru ajyanye n’ibyo baguze, kugira ngo hamenyekane inkomoko yabyo.
Polisi ivuga ko umuntu wese ugura ibikoresho byibwe ku bikorwaremezo aba yishora mu bikorwa binyuranyije n’amategeko kandi ashobora kubihanirwa.
Ibi byabereye i Gisenyi byongeye kwerekana ububi bwo kwiba insinga z’amashanyarazi, cyane cyane ko akenshi bikorwa ahantu amashanyarazi akiriho, bigashyira ubuzima bw’ababikora mu kaga gakomeye.
Mu gihe iperereza rikomeje, umurambo w’uyu musore wari utaramenyekana imyirondoro wajyanywe mu Bitaro bya Gisenyi kugira ngo ukorerwe isuzuma.
Nyuma y’iryo suzuma, ndetse no kumenyekana imyirondoro ye, hazakorwa ibijyanye no kuwushyingura.
Polisi yasabye abaturage gukomeza gutanga amakuru ku bantu bakekwaho kwiba insinga cyangwa ibindi bikoresho by’ibikorwaremezo, kugira ngo ibikorwa nk’ibi biburizwemo mbere y’uko biteza impfu cyangwa guhungabanya serivisi zihabwa abaturage.
Izindi nkuru:
Rubavu yashyizeho ingamba zikomeye nyuma y’icyorezo cya ‘Ebola’ kiri muri Goma
Gatsibo: Abagabo babiri bakurikiranyweho guheza mugenzi wabo mu bwiherero
Rusizi: Ikamyo yari ipakiye sima yarenze ikorosi yinjira mu nzu y’umuturage
Kamonyi: Umugabo yasanzwe yapfiriye mu nzu, hatangijwe iperereza
Iburasirazuba: Polisi yafashe abantu 43 bakekwaho guhisha inzoga zabujijwe ku isoko
Huye: umwana w’imyaka ibiri yishwe azize inkongi y’umuriro
Rutsiro: Umusaza w’Imyaka 67 Yapfiriye Mu Murimo Wo Kubumba Amatafari
Huye: Umwana umwe yapfuye abandi babiri barakomereka mu nkongi y’umuriro yatewe n’amashanyarazi
Karongi: Urupfu rw’umwarimu warohamye mu Kivu rwasigiye icyuho gikomeye GS Sainte Marie Kibuye
Imipaka ya Rubavu na Goma yafunzwe by’agateganyo kubera ‘Ebola’