AMRV Igiye kuzana Amakamyo akoresha Amashanyarazi no kubaka Uruganda ruyateranya mu Rwanda

Ubuyobozi bw’Ikigo Asia Machinery Rwanda Vehicles, gisanzwe gicuruza amakamyo yo mu bwoko bwa Howo mu Rwanda, bwatangaje ko bufite gahunda yo gutangira kuzana amakamyo akoresha amashanyarazi ndetse no kubaka uruganda ruzajya ruteranyirizwamo amakamyo akoresha mazutu mu Karere ka Kayonza.

Ibi byatangajwe ku wa 26 Kamena 2026 mu gikorwa cyo kwizihiza imyaka 10 iki kigo kimaze gikorera mu Rwanda, cyahuriyemo n’abakiliya bacyo hagamijwe kurebera hamwe uburyo bwo kurushaho kunoza imikoranire no kubamurikira ikamyo nshya ya Howo ivuguruye.

Nk’uko IGIHE yabitangaje, Umuyobozi Mukuru wa Asia Machinery Rwanda Vehicles, Ruzagiliza Francis, yavuze ko kuva iki kigo cyatangira ibikorwa byacyo mu 2015, cyagize uruhare mu guteza imbere urwego rw’ubwikorezi bw’imizigo mu Rwanda.

Yasobanuye ko mbere y’aho, ibikorwa byinshi byakoreshaga amakamyo mato, ibintu byatumaga imirimo idindira, ariko ko amakamyo manini ya Howo yafashije ibigo n’abikorera kwihutisha ibikorwa byabo.

Yagize ati: “Mbere wasangaga hakoreshwa udukamyo duto, imirimo ikadindira. Ubu amakamyo yacu yafashije abantu kwihutisha imirimo ikarangirira igihe.”

Amakamyo akoresha amashanyarazi agiye kugera ku isoko ry’u Rwanda

Amakuru yatangajwe na IGIHE agaragaza ko Asia Machinery Rwanda iri gutegura kuzana amakamyo akoresha amashanyarazi, mu rwego rwo kugendana n’impinduka ziri kuba ku Isi zigamije kugabanya ikoreshwa ry’ibikomoka kuri peteroli no kurengera ibidukikije.

Ruzagiliza yavuze ko ayo makamyo azaba afite ubushobozi bwo gukora urugendo ruri hagati ya kilometero 250 na 300 nyuma yo kongererwa umuriro inshuro imwe.

Yongeyeho ko ibikorwa remezo byo kuyashyiramo umuriro byatangiye kubakwa i Kigali, mu gihe n’i Kayonza hateganyijwe kubakwa ikindi kigo kizaba cyuzuye bitarenze Ukuboza 2026.

Nk’uko IGIHE yakomeje ibitangaza, biteganyijwe ko ayo makamyo mashya azaba ageze ku isoko ry’u Rwanda bitarenze muri Nzeri 2026.

Uruganda ruzateranyirizwamo amakamyo rugiye kubakwa i Kayonza

Uretse gahunda yo kuzana amakamyo akoresha amashanyarazi, Asia Machinery Rwanda yanatangaje ko igiye kubaka uruganda ruzajya ruteranyirizwamo amakamyo mu Karere ka Kayonza.

Urwo ruganda ruteganyijwe gutangira gukora bitarenze muri Nzeri 2027, rukazatanga akazi ku bantu barenga 1.500.

Amakuru yatangajwe na IGIHE agaragaza ko uru ruganda ruzafasha kugabanya igihe abakiliya bategereza kugira ngo bahabwe amakamyo batumije, ndetse runagabanye ibiciro byayo, mu gihe ruzanazamura ubushobozi bw’u Rwanda mu rwego rw’inganda.

Byitezwe kandi ko ruzajya rutanga amakamyo ku masoko yo mu bindi bihugu byo mu Karere ka Afurika y’Iburasirazuba, bisanzwe biza kuyagurira mu Rwanda.

Howo nshya igabanya ikoreshwa rya mazutu

Muri uwo muhango, Asia Machinery Rwanda yanamuritse ikamyo nshya ya Howo ifite ikoranabuhanga rigezweho rituma yishyiramo amavitensi ubwayo, ikanakoresha mazutu nke ugereranyije n’amakamyo asanzwe.

Iyo kamyo kandi ihabwa garanti y’imyaka itanu, ikintu ubuyobozi bw’iki kigo buvuga ko kigaragaza icyizere gifitiye ubuziranenge bwayo.

U Rwanda mu myaka 10 y’iterambere

Mu myaka icumi ishize, Asia Machinery Rwanda Vehicles imaze guha akazi abantu bagera kuri 80, barimo 50 bakorera mu igaraje ryayo rigezweho. Iki kigo kandi gicuruza hagati y’amakamyo 400 na 500 buri mwaka.Umwe mu bakiliya bacyo, Nzamurambaho Obed, yavuze ko kuva yagura ikamyo ye ya mbere muri iki kigo mu 2021 atigeze ahura n’ikibazo gikomeye, ari na yo mpamvu akomeje kukigirira icyizere no kongera kuhagurira andi makamyo.