Ubushakashatsi bushya bwerekanye ko kuryama ahantu hari urumuri rwinshi nijoro bishobora kugira ingaruka ku mikorere y’umutima ndetse bikongera ibyago byo kwibasirwa n’indwara z’umutima mu gihe kiri imbere.
Abashakashatsi bagaragaje ko n’urumuri ruke umuntu ahura na rwo mu gihe asinziriye rushobora kugira uruhare mu guhindura imiterere n’imikorere y’imikaya y’umutima.
Dr. Lu Qi, umwe mu bayoboye ubu bushakashatsi akaba n’umwarimu muri Kaminuza ya Tulane muri Leta Zunze Ubumwe za Amerika, yavuze ko urumuri rwinshi nijoro rugenda rugaragara nk’ikindi kintu gishobora kugira uruhare mu ndwara z’umutima n’imiyoboro y’amaraso.
Ubushakashatsi bwasohotse mu kinyamakuru cy’ubuvuzi European Heart Journal, bwakorewe ku bantu barenga 11,000 batari bafite indwara z’umutima ubwo bwatangiraga.
Abitabiriye ubushakashatsi bambaye ibikoresho bipima urumuri ku kuboko mu gihe cy’iminsi irindwi. Nyuma y’imyaka itatu, bakorewe isuzuma ry’umutima hakoreshejwe MRI kugira ngo harebwe imiterere n’imikorere yawo.
Abashakashatsi basanze abantu baryama ahantu hari urumuri rurenze lux 3 bashobora kugira impinduka ku mikaya y’umutima, harimo kubyimba kw’igice cy’umutima cyitwa ventricule gauche, bikaba bishobora kugabanya ubushobozi bwo gusunika amaraso neza.
Uko urumuri rwiyongera mu cyumba umuntu aryamamo, ni ko n’ingaruka ku mutima zishobora kwiyongera. Mu bitera urumuri nijoro harimo telefoni iri hafi kandi ireba hejuru, isaha y’ikoranabuhanga imurika ndetse n’urumuri ruturuka hanze y’inzu.
Abahanga bavuga ko icyumba umuntu aryamamo gikwiye kuba gifite urumuri ruke cyane, aho urwego rwiza ruri munsi ya lux 1.
Basaba abantu kuzimya amatara adakenewe nijoro, gukoresha amarido afunga urumuri ruturuka hanze no kwirinda ibikoresho bitanga urumuri hafi y’aho baryama.
Izindi nkuru:
Beterave: Ikiribwa gifasha umwijima, umutima n’ikorwa ry’amaraso mu mubiri
Umuneke: Urubuto rwifitemo intungamubiri zifasha umutima, ubwonko n’igogorwa
Dore ingaruka ushobora guhura na zo mu gihe wirengagije gusinzira bihagije
Kurara Utambaye: Ese Hari Inyungu Bigira ku Buzima? Dore Ibyo Ubushakashatsi Bwerekana
Watermelon: Imbuto yoroshye ariko ifite akamaro gatangaje ku buzima bw’imibonano mpuzabitsina
Uko kugenda n’amaguru bifasha umuntu guhorana akanyamuneza
Kugona Bishobora Kuba Ikimenyetso cy’Indwara Ikomeye Ishobora Kuguhitana Utabizi
Dore ibanga utari uzi ryihishe mu kunywa “Kawa” ihagije ku buzima
Kunywa ibikombe 2–3 by’ikawa ku munsi bishobora kugabanya ibyago by’indwara zimwe z’umutima
Kurota inzozi mbi utwite: Impamvu bishobora kubaho n’icyo ubushakashatsi bubivugaho