Isiganwa rya Rwanda Mountain Gorilla Rally 2026 ryasojwe kuri iki Cyumweru tariki ya 12 Nyakanga 2026, Umunya-Kenya Karan Patel aryegukana nyuma yo kwitwara neza mu byiciro byose byari bigize iri rushanwa.
Patel, wari ufatanyije n’umwungiriza we Khan Tauseef mu modoka ya Skoda Fabia R5, yasoje iri siganwa akoresheje isaha imwe, iminota irindwi n’amasegonda 53, yegukana umwanya wa mbere imbere ya Huwel Ahmed wari kumwe na Solanki Roheet.
Rwanda Mountain Gorilla Rally 2026 yari ibaye ku nshuro ya 26, yitabiriwe n’abakinnyi bakomeye baturutse mu bihugu bitandukanye, barimo n’Umunyarwandakazi Queen Kalimpinya wakurikiwe cyane n’abakunzi b’uyu mukino.
Iri siganwa ryatangiriye kuri Kigali Convention Centre ku wa 10 Nyakanga, aho habaye umuhango wo kurifungura no kwerekana abakinnyi n’imodoka bagombaga kwitabira irushanwa.
Nyuma yaho, ibikorwa nyamukuru byakomereje mu Karere ka Bugesera, aho abakinnyi basiganwe mu mihanda y’igitaka inyura mu duce twa Gasenyi, Gako na Nemba. Muri rusange bakinnyi bahatanye mu byiciro 18 (Special Stages) bifite uburebure bwa kilometero 397.52.
Perezida w’Ishyirahamwe ry’Imikino y’Imodoka mu Rwanda (RAC), Gakwaya Christian, yavuze ko kimwe mu byaranze iri siganwa ari ukwiyongera kw’uruhare rw’abagore, kuko uyu mwaka ryitabiriwe n’abagore bane, ibintu agaragaza nk’intambwe nziza mu guteza imbere uyu mukino.
Iri siganwa kandi ryashyigikiwe n’abafatanyabikorwa batandukanye. BPR Bank yatanze inkunga ya miliyoni 150 Frw, mu gihe Engen Rwanda yabaye umufatanyabikorwa mukuru mu gutanga lisansi yakoreshejwe muri iri rushanwa.
Mu rwego rwo kugaragaza uruhare rwa Leta mu guteza imbere siporo, Minisitiri wa Siporo, Nelly Mukazayire, ni we wafunguye ku mugaragaro Rwanda Mountain Gorilla Rally 2026. Yanagize umwanya wo kugendera mu modoka imwe n’umusiganwa mpuzamahanga Karan Patel mbere y’itangira ry’isiganwa.
Isozwa ry’iri rushanwa ryasize Karan Patel yongeye kwerekana ubuhanga bwe mu masiganwa y’imodoka, mu gihe u Rwanda rukomeje kwiyubaka nk’igicumbi cy’amarushanwa akomeye ya motorsport ku rwego rw’Afurika.
Izindi nkuru:
Umuhanzikazi Bwiza yiseguye ku bafana nyuma yo gukora impanuka ikamubuza gutaramira i Bugesera
Omborenga Fitina yikomye Rayon Sports,ahamya ko yahaboneye akarengane
U Rwanda rwashimye ubwitabire bw’abafana muri Shampiyona y’Isi y’Amagare 2025
Bruce Melodie na The Ben basabye abafana gushyigikira ubumwe mu muziki nyarwanda
M23/AFC yahaye gasopo ingabo z’Abarundi
Amafoto: Dore ibitego byiza APR inyagiye Rayon sport.
Umukino wa Bugesera FC na Rayon Sports uzakomereza ku munota wari ugezeho
Muhire Kevin yabonye ikipe nshya muri Sudani y’Epfo
Lamine Yamal agiye guhabwa nimero ya Messi
Basketball: U Rwanda mu itsinda rikomeye mu gushaka itike y’igikombe cy’Isi