Imirwano ishingiye ku birombe yahitanye abantu i Lomami muri RDC

Imirwano ikomeye yabereye mu Ntara ya Lomami Province muri Democratic Republic of the Congo yahitanye abantu batanu, abandi benshi barakomereka ndetse inzu ziratwikwa.

Aya makimbirane yabaye ku wa 15 Gicurasi 2026 hagati y’abaturage bo mu midugudu ya Bena Mukendi na Bena Mutaamba, iherereye muri Teritwari ya Ngandajika Territory.

Aya makuru yatangajwe na Radio Okapi, yavuze ko abaturage benshi bakomerekeye muri iyi mirwano ndetse ibikorwa byinshi bikangirika.

Intandaro ni ikirombe cy’amabuye y’agaciro

Amakuru atangwa n’ubuyobozi bw’ako gace agaragaza ko ayo makimbirane yaturutse ku kirombe gishya cy’amabuye y’agaciro cyavumbuwe muri ako gace, nubwo ubwoko bw’amabuye ataramenyekana neza.

Bivugwa ko nyuma y’aho hari umuntu waje gushakisha amabuye y’agaciro muri kariya gace, abaturage bo mu midugudu yombi bahise batangira gushyamirana buri ruhande ruvuga ko ubutaka buriho icyo kirombe ari ubwabo.

Ibyo byaje kuvamo imirwano ikomeye yakwiriye muri ako gace, abaturage bamwe bagahunga ndetse hakaba haratwitswe inzu nyinshi.

Imibare y’abapfuye ntiyavuzweho rumwe

Abaturage bavuga ko abantu batanu ari bo bapfuye muri iyo mirwano, mu gihe ubuyobozi bwa teritwari bwo buvuga ko umuntu umwe gusa ari we wapfuye.

Abakomerekeye muri ayo makimbirane bo bavuga ko umwuka ukomeje kuba mubi, cyane cyane ko impande zombi zikomeje kutumvikana ku nyungu zituruka kuri icyo kirombe.

Inzego z’umutekano zoherejwe muri ako gace

Ubuyobozi bwa Teritwari ya Ngandajika bwatangaje ko bwohereje inzego z’umutekano kugira ngo zihoshe ayo makimbirane no gukumira ko yakomeza gufata indi ntera.

Abaturage basabwe kwirinda ibikorwa by’urugomo no gushaka ibisubizo binyuze mu biganiro aho gukoresha imbaraga.

Andi makimbirane y’amabuye y’agaciro yabereye muri Kasai

Radio Okapi dukesha amakuru yose, yanatangaje ko andi makimbirane ashingiye ku bucukuzi bw’amabuye y’agaciro yabereye ahitwa Kalenga Manyi, muri Segiteri ya Bushimaie.

Iyo mirwano yahuje abacukuzi bakomoka muri Kasaï-Central n’abavuye mu Ntara ya Lualaba Province.

Ayo makimbirane yaguyemo abantu batatu, abandi bagera ku icumi barakomereka ku mpande zombi. Umuyobozi w’ako gace, Laurent Ntumba, yasabye abaturage gutuza ndetse anasaba ubuyobozi bw’intara bireba gukemura ayo makimbirane hakoreshejwe ibiganiro.

Ibibazo by’amabuye y’agaciro bikomeje guteza umutekano muke

Abasesenguzi bavuga ko amakimbirane ashingiye ku bucukuzi bw’amabuye y’agaciro akomeje kwiyongera muri bamwe mu bice bya RDC, cyane cyane ahavumbuwe ibirombe bishya

.Bemeza ko ikibazo cy’ubutaka, inyungu zituruka ku mabuye y’agaciro ndetse no kubura uburyo bwiza bwo kuyacunga biri mu bitera amakimbirane akunze kuvamo imirwano n’impfu.

Src: Radio Okapi

Umwanditsi: CYIZA Theogene