Mu Rwanda hateganyijwe amarushanwa azahuriza hamwe ibyiciro 58 by’abanyamwuga

Mu Rwanda hateganyijwe amarushanwa mashya azahuriza hamwe ibyiciro 58 by’abanyamwuga n’abafite ibikorwa by’indashyikirwa mu myidagaduro, ubuhanzi, itangazamakuru, imideri n’imikino.

Aya marushanwa, agiye kuba ku nshuro ya mbere, kuri ubu azabera mu Rwanda, ariko abategura bavuga ko bafite gahunda yo kuyagura akagera no ku rwego mpuzamahanga mu gihe kiri imbere.

Nk’uko Imvaho Nshya yabitangaje, abategura aya marushanwa babigarutseho mu kiganiro n’itangazamakuru cyabaye ku mugoroba wo ku wa 25 Nzeri 2026, basobanura ko intego yayo ari ugushimira no guteza imbere abantu bafite ibikorwa by’indashyikirwa muri izi nzego.

Umwihariko w’aya marushanwa ni uko atazibanda gusa ku bantu basanzwe bafite amazina akomeye, ahubwo azanaha amahirwe abafite impano n’ibikorwa byiza bitaramenyekana cyane.

Ben Rurangirwa, umwe mu batekereje ku itangwa ry’ibi bihembo akaba n’umunyamwuga muri sinema Nyarwanda, yavuze ko aya marushanwa agamije gushyigikira impano no guhuza abantu bafite uruhare mu nzego zitandukanye.

Ati: “Ni urubuga rugamije gushimira ibikorwa by’indashyikirwa, guteza imbere impano no kurushaho guhuza abafite uruhare mu ruganda rw’imyidagaduro, ubuhanzi, itangazamakuru na siporo.”

Mu byiciro 58 bizahatana harimo iby’umuziki, filimi, filimi z’uruhererekane, urwenya, imideri, itangazamakuru, abakora ibijyanye n’ibikorerwa kuri murandasi ndetse n’imikino.

Muri ibyo byiciro harimo Umuhanzi w’Umwaka, Indirimbo y’Umwaka, Album y’Umwaka, Video y’Indirimbo y’Umwaka, Umukinnyi wa Filimi w’Umwaka, Umukinnyi wa Filimi w’Umukobwa w’Umwaka, Filimi Nziza, Series Nziza n’Umuyobozi wa Filimi w’Umwaka.

Harimo kandi ibyiciro by’imideri n’ibikorerwa kuri murandasi, birimo Umuhanzi w’Imideri w’Umwaka, Umunyabikora wa Content/TikTok, Umunyamakuru w’Umwaka, YouTube Channel y’Umwaka na Podcast Nziza, ndetse n’ibindi.

Mu rwego rw’imikino, hazitabwa ku bikorwa byo muri football, basketball na volleyball, aho hazahatana amakipe, abakinnyi n’abatoza. Hazanatangwa ibihembo byihariye birimo Icon Sportsman of the Year na Icon Sportswoman of the Year.

Abategura bavuga ko mu gutoranya abazahatana hazashingirwa ku mpano zabo, imikorere, ibyo bagezeho, uruhare bagira ndetse n’umusanzu wabo mu guteza imbere imyidagaduro, ubuhanzi, itangazamakuru n’imikino mu Rwanda.

Aya marushanwa afite insanganyamatsiko igira iti “Celebrating Rwanda’s Icons”, igamije kwizihiza no kugaragaza abantu n’inzego bifite ibikorwa byagize uruhare mu guteza imbere izi nzego mu Rwanda.

Abategura bavuga ko nyuma yo gutangirira mu Rwanda, bateganya ko mu gihe kiri imbere aya marushanwa azaguka akagera no ku rwego mpuzamahanga.