Abarenga miliyoni bagiye gufashwa na Plan International Rwanda, biganjemo abagore n’abakobwa

Umuryango Plan International Rwanda, ukorera mu guteza imbere uburenganzira bw’umwana, uburinganire n’iterambere ry’umukobwa, watangaje ko mu myaka itanu iri imbere (2026–2030) uzafasha abana, abakobwa n’urubyiruko bagera kuri miliyoni 1.2, biganjemo abakobwa 750,000.

Ibi byatangarijwe mu muhango wabaye ku wa 23 Ukwakira 2025, ubwo Plan International Rwanda yamurikaga igenamigambi rishya ry’imyaka itanu, ryubakiye ku nkingi ebyiri zikomeye:

1. Guhanga umurimo no kubaka imibereho myiza y’urubyiruko n’imiryango,
2. Kubaka ahazaza heza h’abana binyuze mu burezi n’ubuzima bw’imyororokere.

Kwimakaza ikoranabuhanga no gukorana n’inzego z’ibanze

Iri genamigambi rishya rizibanda ku koroshya ubufatanye n’inzego z’ibanze, imiryango itegamiye kuri Leta ndetse no kwimakaza ikoranabuhanga mu bikorwa by’iterambere.
Uturere Plan International ikoreramo twiyongereye kuva kuri dutatu tukagera ku icumi, harimo utwo izakoramo mu mushinga Education Outcomes Fund (EOF).

“Turi hano gushyigikira icyerekezo cy’u Rwanda” — Emilie Fernandes

Umuyobozi wa Plan International mu Rwanda, Emilie Fernandes, yavuze ko kwagura ibikorwa ari igisubizo ku byuho bikigaragara nubwo hari intambwe ikomeye yatewe mu iterambere ry’umwana n’urubyiruko.

“Leta y’u Rwanda ifite gahunda nziza zo guteza imbere imibereho y’abana n’urubyiruko, kandi turi hano ngo tuyishyigikire. Twabonye ko ubukene, inda ziterwa abangavu n’imirire mibi bigenda bigabanuka, ariko haracyari icyuho tugomba kuziba,”
— Emilie Fernandes.

Gushimangira ubufatanye n’inzego za Leta

Minisitiri w’Uburinganire n’Iterambere ry’Umuryango, Uwimana Consolée, yashimye umusanzu wa Plan International, avuga ko ibikorwa byayo bihuye n’icyerekezo cya Leta.

“Plan International yadufashije mu kurengera umwana, kwimakaza uburinganire no guteza imbere imiryango. Uburyo mwibanda ku ikoranabuhanga no gukorana n’urubyiruko bihuye n’icyerekezo cyacu cya 2050,”
— Minisitiri Uwimana Consolée.

Ibyagezweho n’abafatanyabikorwa

Mu myaka itanu ishize (2020–2025), Plan International Rwanda yafashije abagenerwabikorwa 770,474, barimo abakobwa 400,000 n’abahungu 302,948.

Kamabonwa Prudencienne wo mu Muryango w’Aba-Guide mu Rwanda, yavuze ko bafashijwe kwigisha urubyiruko kwirinda inda zitateganyijwe, naho Mukantwali Alphonsine wo mu Bugesera ashimangira ko abana 30 bavuye mu mirire mibi bitewe n’ubufasha bahawe n’uyu muryango.

Aho izakorera n’abafatanyabikorwa bayo

Plan International Rwanda izakorera mu turere 10, turimo Bugesera, Nyaruguru, Gatsibo n’utundi turindwi dushya, ndetse no mu nkambi z’impunzi za Mugombwa, Kigeme, Kiziba, Nyabiheke, Mahama, Nkamira, Nyarushishi na Kijote.

Izafatanya n’imiryango umunani irimo:

• AEE Rwanda
• Dream Village Organization
• Imbaraga
• Caritas Rwanda
• Bamporeze
• Association des Guides du Rwanda
• Health Development Initiative
• Learn Work Develop