Ushobora kugira abasirikare benshi, batojwe neza kandi bafite ubushake, ariko iyo udafite intwaro zigezweho, biragora cyane gutsinda urugamba hashingiwe ku miterere y’intambara zigezweho.
Iran na Israel biri mu ntambara karundura, ndetse ibikoresho birimo indege za gisirikare ziri mu za mbere ku Isi, biri kwifashishwa muri iyi ntambara.
Duhereye nko ku bijyanye n’indege z’intambara, Israel ni kimwe mu bihugu bifite indege za gisirikare ziri mu zigezweho ku rwego rw’Isi. Iki gisirikare kibarirwa nibura indege 600, zirimo 40% zigezweho, zikoreshwa mu ntambara.
Izo zirimo nka F-15, F-16 na F-35 z’Abanyamerika, zikaba zimwe mu ndege zifite ikoranabuhanga rihambaye ku Isi. By’umwihariko nk’indege za F-35, ni zo Israel yakoresheje mu bitero karundura iherutse kugaba muri Iran, ari nabyo byatangije iyi ntambara.
Ku rundi ruhande, Iran ni kimwe mu bihugu bifite indege z’intambara zishaje mu Burasirazuba bwo Hagati. Bitekerezwa ko muri rusange Igisirikare cya Iran kirwanira mu kirere gifite indege zibarirwa muri 400, ariko izatagera ku 150 ni zo zishobora gukoreshwa mu ntambara.
Ikoranabuhanga riri ku rwego rwo hasi ndetse no kuba izo ndege zishaje ni kimwe mu bituma Iran itazikoresha, kuko ziganjemo izaguzwe mu myaka 1960 na 1970, usanga zifite ikoranabuhanga ritakigezweho muri ibi bihe.
Izo ndege za Iran zirimo nka F-4 y’Abanyamerika, MiG-29 na Su-22 z’Abarusiya, ari nazo ndege wavuga ko ari nshya mu bubiko bw’indege za Iran, nubwo nazo zifite ikoranabuhanga yo mu myaka 1980 na 1990.
Mu 2022, byavuzwe ko Iran yohereje abapilote bayo kwiga gutwara indege zigezweho zizwi nka Su-35 zikorwa n’uruganda rwa Sukhoi. Izi ni zimwe mu ndege zigezweho ku rwego rw’Isi, zigakorwa n’Abarusiya.
Gusa iyo bigeze ku bijyanye na misile, Iran igerageza kwihagararaho. Iki gihugu kibarurwa nk’icya mbere gifite misile nyinshi mu Burasirazuba bwo Hagati, zibarirwa mu bihumbi 40, uretse ko iyi mibare itemejwe n’iki gihugu ubwacyo.
Ku rundi ruhande, nyinshi muri izi misile ntabwo zifite ubushobozi bwo guhangana na radar cyangwa ubundi bwirinzi bw’ibihugu nka Israel.
Iki gihugu cyatangaje ko cyakoze misile zishobora kugenda ku muvuduko urutwa uw’ijwi, ibituma radar za Israel zidashobora gupfa kuzibona. Zimwe muri izi misile zishobora kugenda ibirometero 3000.
Imwe muri misile za Iran zizwi cyane ni iyitwa Fattah-1 yashyizwe hanze mu 2023, ikaba ishobora no gukoreshwa mu kurasa intwaro kirimbuzi. Iyi ntwaro ni imwe mu nziza ziri ku Isi, aho ishobora kugenda ku muvuduko uruta uw’ijwi inshuro 13 zose.
Amakuru avuga ko iyi ntwaro ishobora kuba yarakoreshejwe bwa mbere mu kugaba ibitero kuri Israel, mu Ukwakira umwaka ushize.
Iran kandi ifite misile nshya izwi nka Haj Qassem, yitiriwe General Qassem Suleimani wishwe na Amerika, akaba yari umwe mu basirikare bakomeye ba Iran.
Ni misile yashyizwe hanze muri Gicurasi uyu mwaka, iminsi mike mbere y’uko iki gihugu gitana mu mitwe na Israel.
Ni misile idasanzwe kuko ishobora no gutwara intwaro kirimbuzi. Iyo yoherejwe, ibanza kwinjira mu Isanzure, nk’uko bigenda ku zindi misile zigezweho, ikagaruka mu kirere cy’Isi igendera ku muvuduko uruta uw’ijwi inshuro 12, ikagera aho yateganyirijwe kurasa iri kugendera ku muvuduko uruta uw’ijwi inshuro eshanu.
Amakuru avuga ko iyi misile nta bwirinzi bufite ubushobozi bwo kuyikumira, ndetse ngo iri mu zikoreshwa iyo Iran ishaka kurasa muri Israel, mu ntambara ikomeje guhuza ibihugu byombi.
Israel nayo ntabwo ari agafu k’imvugwarimwe kuko ifite misile 700 zizwi nka Predator Hawk n’indi izwi nka Jericho-3 ishobora kugenda ibirometero 6000 byose.
Mu gitero Israel iherutse kugaba muri Iran, yakoresheje indege z’intambara 200, irasa ibisasu 330 mu duce tugera ku 100.
Ku bijyanye n’ubwirinzi bwo mu kirere, Israel ifite ubugezweho burimo ubuzwi nka Iron Dome, ikaba iri no gukoresha ubwo yahawe na Amerika bwose hamwe bugera kuri bune.
Iran nayo ifite ubwirinzi bwayo buzwi nka Bavar-373 na Bavar-373-II, ndetse no mu 2016 yaguze ubwirinzi buzwi nka S-300PMU2, nyuma y’uko ibihugu byombi byemeranyije ubugure mu 2007.
Magingo aya, ubu bwirinzi bwose bwamaze kwangizwa bikomeye na Israel, ari nayo mpamvu Iran idafite ubushobozi bwo kurinda ikirere cyayo.
Izindi nkuru:
Iran yateguje ibyago by’ibihe byose nyuma y’igitero yagabweho na Amerika
Tanzania: Polisi ya Tanzania yabitse Perezida Samia Suluhu Hassan
“Amazi ntakiri ya y’andi!” Intambara hagati ya Iran na Israel yakomeye
Gen Muhoozi yageze i Kinshasa bwa mbere mu myaka irenga 20
Inkongi y’umuriro yongeye kwibasira America, ishobora kugera ahabitse ibisasu kirimbuzi, abasaga ibihumbi 3 bamaze kugirwaho ingaruka niyi nkongi.
Ingabo za Congo zirashijwa kurya inka za Joseph Kabila wahoze ari perezida wa Congo (DRC).
USA: Trump yatangaje umusoro wi 100% kuri filime zatunganyirijwe hanze y’Amerika.
Museveni wa Uganda yashimangiye ko adashyigikiye ubutinganyi habe namba.
Tanzania yirukanye Boniface Mwangi wa Kenya
Minisitiri weguye muri Guverinoma ya Congo yabyegetse ku Rwanda