Nvidia yashoye miliyari 1$ muri Nokia, imigabane yayo izamukaho 22%

Sosiyete y’ikoranabuhanga ya Nokia yo muri Finlande yatangaje ko Nvidia, uruganda rukomeye ku isi rukora chips zifashishwa mu bwenge bw’ubukorano (AI), yashoyemo miliyari imwe y’amadolari mu rwego rwo guteza imbere ikoranabuhanga rya 6G no gushimangira ubufatanye mu bikorwa by’ikoranabuhanga rigezweho.

Iri shoramari ryatumye imigabane ya Nokia izamuka ku kigero cya 22% ku isoko ry’imari n’imigabane, mu gihe iyi kompanyi iteganya gushyira ku isoko imigabane mishya isaga miliyoni 166 izafasha mu ishyirwa mu bikorwa ry’imishinga ijyanye na AI n’indi migambi y’ubucuruzi rusange.

Nk’uko byatangajwe n’impande zombi, Nvidia na Nokia byasinyanye amasezerano y’ubufatanye mu gukora no guteza imbere ikoranabuhanga ryo mu rwego rwa 6G, ndetse no gukoresha AI mu miyoboro y’itumanaho hagamijwe kongera umuvuduko no kugabanya ibiciro mu gutanga serivisi z’itumanaho.

Nvidia yatangaje ko iri gusuzuma uburyo ikoranabuhanga rya Nokia ryakoreshwa mu mishinga yayo y’ubwenge bw’ubukorano n’imiyoboro yihuta, nk’uko isoko ryo ku isi rigenda rigira uruhare runini mu gukoresha AI mu buzima bwa buri munsi.

Nokia, yigeze kwamamara cyane kubera telefone zakunzwe cyane mu myaka ya 2000, kuri ubu yibanda cyane ku gucuruza ibikoresho bya 5G no gutanga ibisubizo by’itumanaho ku masosiyete mpuzamahanga.

Iyi nkuru ije mu gihe Umuyobozi Mukuru wa Nvidia, Jensen Huang, yitegura kugeza ijambo i Washington D.C., aho azagaruka ku bufatanye bushya n’imishinga y’iterambere ya sosiyete ayoboye.

Mu mezi ashize, Nvidia imaze kwagura ibikorwa byayo binyuze mu ishoramari rikomeye, irimo miliyari 5$ muri Intel, miliyari 100$ muri OpenAI, miliyoni 500$ muri Wayve (uruganda rw’imodoka zigenzurwa na AI), ndetse na miliyoni 667$ muri Nscale, ikigo cy’itumanaho cyo mu Bwongereza.

Ubu bufatanye bushya bwa Nvidia na Nokia bufatwa nk’indi ntambwe ikomeye mu guhuza inganda ebyiri zikomeye mu ikoranabuhanga, mu gihe isi ikomeje kwinjira mu bihe bishya bya AI n’imiyoboro y’itumanaho yihuta cyane.