Abaturage b’i Nairobi, mu Murwa Mukuru wa Kenya, bongeye kwirara mu mihanda mu myigaragambyo yitabiriwe ku rwego rwo hejuru, aho bari kwibuka bagenzi babo bishwe mu myigaragambyo yabaye mu mwaka ushize ndetse batishimiye uburyo ubuzima bukomeje guhenda, ari nako amahirwe y’iterambere ku rubyiruko arushaho kuyoyoka.
Mu gitondo cyo kuri uyu wa Gatatu, abaturage ibihumbi babyukiye mu mihanda mu rwego rwo kwibuka umwaka ushize abarenga 60 bishwe, icyo gihe bari mu myigaragambyo karundura yo kwamagana umushinga w’itegeko wari ugamije kongera imisoro mu gihugu.
Abaturage bavuze ko uwo mushinga ugamije gutuma ubuzima buhenda, bityo bajya mu mihanda barawamagana. Icyo gihe ariko Inteko Ishinga Amategeko yatoye iwemeza, hari ku itariki ya 25 Kamena.
Mu myigaragambyo yabaye icyo gihe, abaturage binjiye mu Nteko Ishinga Amategeko, batwika umuryango waho ndetse batuma abadepite bahunga mbere y’uko inzego z’umutekano zihagoboka.
Byaje kurangira Perezida w’icyo gihugu, William Ruto ahagaritse uwo mushinga w’itegeko, gusa abaturage bakomeza gusaba ko abagize uruhare mu rupfu rw’abigaragambije bagomba kubiryozwa, uretse bitakozwe ku kigero abaturage bifuzaga.
Basabaga kandi ko abafunzwe n’abashimuswe barekurwa, ingingo Polisi ya Kenya yakunze gutera utwatsi, ikavuga ko nta baturage yishe ndetse nta n’abo yashimuse.
Mbere y’uko iyi myigaragambyo iba, hari haherutse kuba indi myigaragambyo yabaye mu cyumweru gishize, yamagana ubugizi bwa nabi bukorwa na Polisi. Iyi myigaragambyo yafashe umurego nyuma y’urupfu rwa Albert Ojwang wapfiriye aho yari afungiwe na Polisi.
Ibi byatumye abaturage bamagana ubwo bugizi bwa nabi, gusa ngo mu gihe bari muri ibyo bikorwa, Polisi n’ubundi yakoresheje imbaraga z’umurengera mu guhangana nabo. Bivugwa ko hari abantu bari bambaye imyenda ya gisivile ariko bitwaje intwaro, bari barimo gukurikirana uburyo Polisi ya Kenya ihangana n’abigaragambya.
Kuri uyu wa Kabiri, Perezida Ruto yari yatanze integuza, aburira abashobora guhangana n’inzego z’umutekano. Ati “Ntiwahangana na Polisi. Ntabwo wakoresha imbaraga uhangana na Polisi, uyituka cyangwa uyitera ubwoba. Iyo ubikoze, uba uri gushyira mu byago igihugu cyacu.”
Bamwe mu baturage bagaragaye bahanganye n’inzego z’umutekano, bakazitera amabuye nazo zibakubita. Abaturage bari bafite ibyapa byanditseho amagambo arimo ngo “Ruto agomba kugenda.”
Amakuru avuga ko abagera kuri 10 bamaze kujyanwa kwa muganga nyuma yo kugira ibikomere byaturutse ku masasu barashwe. Polisi yafunze imihanda myinshi y’i Nairobi irimo ijya ku Nteko Ishinga Amategeko, ijya mu gace gakorerwamo ubucuruzi n’indi y’ingenzi.
Guverinoma ya Kenya kandi yabujije ibinyamakuru birimo radiyo na televiziyo kugaragaza amashusho yerekana uko iyo myigaragambyo iri kugenda, ibyo bamwe bavuze ko bitandukanye n’Itegeko Nshinga ry’icyo gihugu.
Izindi nkuru:
M23/AFC ikomeje guhiga abahungabanya umutekano i Goma
Umusore w’imyaka 27 yishwe arashwe ubwo yavaga mu kirori k’isabukuru
Umuturage yatoraguye imbunda yari itabye mu murima
Gicumbi: Ubworozi bw’amasazi bwamugize umukungu
Tanzania yirukanye Boniface Mwangi wa Kenya
Minisitiri Nduhungirehe yahaye ikaze abafana ba Arsenal baturutse hirya no hino muri Afurika
U Rwanda na RDC byemeranyije ku ngingo zigize amasezerano y’amahoro
Amb. Uwihanganye yatanze impapuro zo guhagararira u Rwanda muri Brunei
Abasenateri 40 ni bo bari gusuzuma niba Joseph Kabila yakwamburwa ubudahangarwa
Tanzania: Polisi ya Tanzania yabitse Perezida Samia Suluhu Hassan
Nshimiyimana Emmanuel ukekwaho kwica umugore we yafashwe n’abanyerondo.
Babiri batambutsa ibiganiro kuri YouTube bafunzwe
Congo: Ubuyobozi bwatangaje ko abarenga 100 bapfiriye muri Kivu
Ubuyobozi bwa Association Rayon Sports bwagize icyo buvuga ku mvururu zabaye ubwo Rayon Sport yakinaga na Bugesera FC
“Amazi ntakiri ya y’andi!” Intambara hagati ya Iran na Israel yakomeye
HE Paul KAGAME ati: ” Ntabwo dufite byinshi byatuma duteta”
Polisi yabaguye gitumo bafite udupfunyika 93 tw’urumogi
Museveni wa Uganda yashimangiye ko adashyigikiye ubutinganyi habe namba.
Perezida Kagame yagaragaje icyatuma umutekano wa Afurika ugerwaho utavangiwe n’amahanga
Ikubuga k’indege cya Bugesera cyagenewe akayabo