Mu mukino w’umunsi wa 26 wa Shampiyona y’Icyiciro cya Mbere, APR FC yanyagiye Marines FC ibitego 3-0, itsinda ryayihesheje kugaruka ku mwanya wa mbere by’agateganyo
Uyu mukino wabereye kuri Kigali Pele Stadium ku mugoroba wo ku wa Gatatu, tariki ya 7 Gicurasi 2025. APR FC yari ikeneye amanota atatu kugira ngo isubire ku isonga, mu gihe Marines FC yifuzaga intsinzi yo kugabanya amahirwe yo kumanuka.
Umukino watangiye nta mvuduko mwinshi, ariko APR FC yigaragaje nk’ikipe ifite ubuhanga bwo kugenzura umukino, nubwo yakiniraga mu kibuga cyayo igihe kinini.
Denis Omedi yafunguye amazamu ku munota wa 18, atsinda igitego cya mbere ku mupira w’imiterekano umunyezamu Irambona Vally wa Marines FC atabashije gukuramo.
Nyuma y’iki gitego, Marines FC yashatse kwishyura, ariko uburyo yabonye ntibwagize icyo buhindura. Ku munota wa 45, Djibril Ouattara yatsinze igitego cya kabiri cya APR FC, nyuma yo gucenga abakinnyi babiri ba Marines no kuroba umunyezamu.
APR FC yagiye kuruhuka iyoboye umukino n’ibitego 2-0.
Marines FC yatangiye igice cya kabiri ihita ikora impinduka eshatu ziganjemo abakinnyi bafite imbaraga, ariko ntibyahinduye isura y’umukino.
Ku munota wa 67, Denis Omedi yatsinze igitego cya gatatu cya APR FC ku mupira wa koruneri yatewe na Niyibizi Ramadhan, agitsindisha umutwe, biba igitego cya kabiri kuri we muri uyu mukino.
APR FC yakomeje gusatira ishaka n’igitego cya kane, ariko amahirwe yabonetse ku munota wa 80 abura uko abyazwa umusaruro na Victor Mbaoma.
Umukino warangiye APR FC itsinze Marines FC 3-0, ikarara ku mwanya wa mbere n’amanota 55, irusha abiri Rayon Sports ifite umukino w’ikirarane izakina na Rutsiro FC ku wa Kane
