Urukiko rw’Ikirenga rwa Leta Zunze Ubumwe za Amerika rwahagaritse by’agateganyo ishyirwa mu bikorwa ry’icyemezo cy’ubutegetsi bwa Perezida Donald Trump cyo kwirukana abimukira baturutse muri Venezuela.
Urukiko rw’Ikirenga muri Leta Zunze Ubumwe z’Amerika rwategetse ko Leta itazakomeza kwirukana abimukira bari bafunzwe n’urwego rw’abinjira n’abasohoka, kugeza igihe hazasohokera umwanzuro mushya. Iyi ngingo yafashwe ku itariki ya 17 Mata 2025, nyuma y’ikirego cyatanzwe n’abanyamategeko b’umuryango uharanira uburenganzira bw’ikiremwamuntu, basaba ko habaho igikorwa cyihuse nyuma y’uko bigaragaye ko abimukira bari barinzwe mu buryo butemewe n’amategeko.
Uyu muryango wagaragaje ko Leta ya Amerika iri gukoresha itegeko ryo mu 1798 ryo kwirukana abimukira, ariko ryari ryarateganyirijwe gusa ibihe by’intambara. Wanenze ko abimukira batari bahawe amahirwe yo kwisobanura cyangwa kugira uruhare mu manza zabo.
Nubwo kugeza ubu ibiro bya Perezida wa Amerika (White House) bitaratangaza icyo bazakora ku cyemezo cy’urukiko, hari impungenge ko Donald Trump ashobora kutubahiriza icyo cyemezo. Mu gihe yagiraga amahirwe yo kuyobora igihugu, Trump yari yavuze ko azakoresha iri tegeko mu kwirukana abimukira batemewe mu buryo bw’amategeko, yerekana ko abenshi muri bo bahungabanya umutekano w’igihugu.
Trump kandi yavuze ko abimukira baturutse muri Venezuela bashyira mu byago umutekano wa Amerika, kuko avuga ko baba baturuka mu gatsiko k’abagizi ba nabi kitwa “Tren de Aragua”. Ku wa 17 Mata 2025, yavuze ko aba bimukira bakoze ibyaha bikomeye, birimo ubwicanyi, kandi ko bamwe muri bo ari abari bamaze gusohoka mu magereza muri Venezuela, bikaba byongera impungenge ku mutekano w’igihugu.
