Mu gihe hari abatekereza ko ubuzima bwiza bushingira gusa ku biribwa byiza, imiti cyangwa amafaranga. Nyamara, ubushakashatsi butandukanye bukomeje kwerekana ko uburyo umuntu yitekerezamo ndetse n’imyemerere agira ku buzima bwe bishobora kugira uruhare runini ku mibereho ye no ku gihe ashobora kumara ku isi.
Iyo umuntu ahora yibwira ko adashoboye cyangwa ko nta cyiza cyamubaho, akenshi ibikorwa bye nabyo bigaragaza gucika intege. Ariko umuntu ufite imyemerere imwubaka, yirinda kwiheba kandi agakomeza gushaka ibisubizo n’iyo ahuye n’ibibazo bikomeye.
Icyo abavugarikijyana babivugaho
Bamwe mu bavuga rikijyana mu bijyanye n’iterambere ry’umuntu bagaragaza ko impinduka nziza zitangirira mu bitekerezo. Iyo umuntu ahinduye uko abona ikibazo, ashobora no guhindura uburyo agikemura. Aho kubona ubwoba nk’inzitizi, ashobora kububona nk’ikimenyetso cyo kwitegura gukora ikintu gikomeye.
Icyo abahanga babivugaho
Abahanga mu mitekerereze ya muntu bavuga ko imyitwarire myiza ituma umuntu arushaho kwita ku buzima bwe. Abantu biyizera bakunda gukora siporo, kurya neza no kwirinda ibintu byangiza ubuzima. Iyo mibereho myiza ni imwe mu mpamvu zituma bagira amahirwe menshi yo kuramba.
Icyo abashakashatsi babivugaho
Ubushakashatsi bwakozwe n’inzobere mu by’imibereho bwagaragaje ko abantu bafite icyizere ku hazaza habo bakunda kugira ibyishimo byinshi ndetse bakagira amahoro yo mu mutima. Iyo umuntu yumva ko ejo he hashobora kuba heza, bimufasha gukomeza gukora no guhangana n’ibibazo aho kwihererana intimba.
Uruhare rw’Iyobokamana
Hari kandi uruhare rw’iyobokamana cyangwa ibikorwa byo gusenga ku mibereho ya muntu. Abantu benshi basenga bavuga ko bibafasha kubona ituze, icyizere ndetse n’imbaraga zo gukomeza urugendo rw’ubuzima n’iyo bahuye n’ingorane. Ibyo bishobora gutuma bagira umutima utuje ndetse bakabana neza n’abandi.
Nubwo bimeze bityo ariko, abashakashatsi bagaragaza ko imyemerere myiza igomba kujyana n’ibikorwa bifatika. Kwifuza ubuzima bwiza cyangwa gutsinda ntabwo bihagije, ahubwo umuntu agomba gukora, kwihugura no kwitegura ibimushobora. Imyemerere iba nziza iyo itera umuntu gutera intambwe aho gutegereza ibintu bidafite ibikorwa.
Ikibazo gikomeye gikunze kugaragara ni uko bamwe baguma mu mitekerereze ibasenya kubera gutinya impinduka.
Hari abanga kwakira ibitekerezo bishya cyangwa inama zishobora kubafasha, bakumva ko uwabibabwiye ari umwanzi. Nyamara rimwe na rimwe kwemera kureba ibintu mu buryo bushya bishobora guhindura ubuzima bw’umuntu cyane.
Impuguke zemeza ko umuntu ushaka gutera imbere agomba kwitoza kugira imyemerere imwubaka, akemera kwiga no guhinduka igihe bibaye ngombwa. Iyo umuntu yitoje gutekereza neza no gukora ibikorwa byiza, aba yiyongereye amahirwe yo kugira ubuzima bwiza, ibyishimo ndetse no kuramba.
Src: Inyarwanda
