Urukiko Rwongeye Gukoma Mu Nkokora Itegeko rya Trump ku Matora

Boston, Amerika – Urukiko rw’Ubujurire rwa Leta Zunze Ubumwe za Amerika rwatesheje agaciro icyifuzo cy’ubutegetsi bwa Perezida Donald Trump cyari kigamije gushyira mu bikorwa itegeko rikaza gukaza amabwiriza agenga amatora akorwa hakoreshejwe amabaruwa mbere y’amatora ateganyijwe mu Ugushyingo 2026.

Uru rukiko rwemeje icyemezo cyari cyafashwe n’Umucamanza Indira Talwani, wavuze ko bimwe mu bikubiye muri iri tegeko binyuranyije n’Itegeko Nshinga rya Amerika. Talwani yagaragaje ko Perezida adafite ububasha bwo gutegeka Minisiteri y’Umutekano w’Imbere mu Gihugu (DHS) gukora urutonde rw’abemerewe gutora cyangwa ngo ategeke Ikigo cy’Iposita cya Leta Zunze Ubumwe za Amerika (USPS) kugenzura abemerewe koherezwa impapuro z’itora.

Iri tegeko rya Trump ryari rigamije gukoresha amakuru y’inzego za Leta mu gukora urutonde rw’abaturage bemerewe gutora, ndetse no kugabanya uburyo amatora yoherezwa hakoreshejwe amabaruwa. Intara zirenga 20 hamwe n’Umujyi wa Washington D.C. zari zaratanze ikirego zivuga ko Perezida yarenze ku bubasha bwe kuko amategeko y’amatora agenwa n’Intara na Kongere, atari Perezida.

Mu cyemezo cye, Umucamanza Talwani yanavuze ko ubutegetsi bwa Trump budakwiye gutera ubwoba abayobozi b’amatora bo mu ntara bubabwira ko bashobora gukurikiranwa n’ubutabera nibadakurikiza ayo mabwiriza. Yagaragaje ko urutonde rw’abaturage rwari ruteganyijwe gukoreshwa rutari rwuzuye kandi rushobora gutera ibibazo mu matora .

Iki cyemezo ni indi ntsinzwi y’abarwanya impinduka Trump yashakaga gukora mu mikorere y’amatora, mu gihe ubutegetsi bwe bushobora gukomeza urugamba rwabwo bukageza uru rubanza mu Rukiko rw’Ikirenga rwa Amerika.