Umuryango Health Builders, ku bufatanye na Minisiteri y’Ubuzima (MINISANTE) n’Akarere ka Rwamagana, watangije ku mugaragaro ibikorwa byo kwagura no kuvugurura Ikigo Nderabuzima cya Muyumbu mu mushinga uzatwara amadolari ya Amerika 485.000, asaga miliyoni 709 Frw.
Uyu mushinga watangijwe kuwa 19 Kamena 2026, ugamije kongerera ubushobozi iki kigo nderabuzima mu gutanga serivisi z’ubuvuzi, by’umwihariko izijyanye no kwita ku babyeyi babyara n’abana bavuka.
Biteganyijwe ko ibikorwa byo kwagura iki kigo bizatuma kibasha kwakira no kuvura abaturage barenga ibihumbi 60 batuye mu Murenge wa Muyumbu no mu bice bihana imbibi, mu gihe ubushobozi bwacyo bwari bumaze kurengerwa n’umubare munini w’abagikenera serivisi.
Umuhango wo gushyira ibuye ry’ifatizo ku nyubako zizubakwa witabiriwe n’abayobozi bo mu rwego rw’ubuzima, abahagarariye abaturage, abakozi ba Health Builders ndetse n’abaterankunga bayo, barimo Al Pace na Kristin Morch bo muri Canada, bashinze Pace Family Foundation, ari na yo muterankunga mukuru muri uyu mushinga.
Pace Family Foundation na Health Builders bisanzwe bifatanya mu bikorwa bitandukanye byo guteza imbere urwego rw’ubuzima mu Rwanda, aho byamaze gufasha mu kubaka ibigo nderabuzima bitanu n’amavuriro y’ibanze atatu.
Mu bikorwa bizakorwa harimo kubaka inzu nshya y’ababyeyi, izaba ifite icyumba cyo kubagiramo n’aho gutangirira ubuvuzi bwihuse ku bagore bagira ibibazo byihutirwa mu gihe cyo kubyara. Hazubakwa kandi ibyumba byo kwakira no kwita ku babyeyi nyuma yo kubyara ndetse n’aho kwita ku mpinja.
Inyubako zisanzwe z’Ikigo Nderabuzima cya Muyumbu na zo zizavugururwa, cyane ko zimwe zimaze gusaza kuko iki kigo cyashinzwe mu 1987. Hazanavugururwa imiyoboro y’amazi n’amashanyarazi ndetse hanongerwe ibikorwa by’isuku n’isukura mu rwego rwo gukumira indwara zishobora kwandurira kwa muganga.
Uyu mushinga nurangira uzafasha kuzamura ireme rya serivisi z’ubuvuzi, kunoza ubuvuzi bw’ababyeyi n’impinja, guteza imbere gahunda y’ubuzima bw’umuryango, kwakira abarwayi benshi kurushaho no kugabanya umubare w’aboherezwa kuvurirwa ku Bitaro bya Rwamagana.
Umuyobozi w’Akarere ka Rwamagana, Mbonyumuvunyi Radjab, yavuze ko uyu mushinga uje gukemura ikibazo cy’ubushobozi buke iki kigo nderabuzima cyari gifite ugereranyije n’umubare w’abagikenera.
Yagize ati: “Uyu munsi Ikigo Nderabuzima cya Muyumbu gitanga serivisi ku bantu barenga 62.000 kandi uyu mubare ukomeje kwiyongera. Igice cyari gisanzwe gikoreshwa mu kwakira ababyeyi babyara cyari gito cyane ku buryo kitashoboraga kwakira abantu benshi. Uyu mushinga tuwitezeho kongera ireme rya serivisi z’ubuvuzi ku baturage.”
Umuyobozi Nshingwabikorwa wa Health Builders, Musilikare Michel, yavuze ko uyu mushinga ari urugero rwiza rw’ubufatanye bugamije guteza imbere serivisi z’ubuzima.
Yagize ati: “Ibi bikorwa ntabwo ari ugutangiza umushinga w’ubwubatsi gusa, ahubwo ni intambwe ikomeye mu guharanira ubuzima bwiza bw’ababyeyi, abana n’imiryango. Ku bufatanye na MINISANTE, Akarere ka Rwamagana, abaterankunga bacu n’abaturage, turi kurushaho kwegeza serivisi z’ubuvuzi bufite ireme ku bazikeneye.”
Al Pace, umwe mu bashinze Pace Family Foundation, yavuze ko amateka y’umuryango we mu rwego rw’ubuvuzi ari yo yabateye gukomeza gushyigikira iterambere ry’urwego rw’ubuzima mu Rwanda.
Health Builders ni umuryango nyarwanda washinzwe mu 2007 ugamije kongera uburyo abaturage babona serivisi z’ubuvuzi bufite ireme. Kugeza ubu ushyigikira ibikorwa by’ibigo nderabuzima birenga 80 mu gihugu, umaze kubaka ibigo nderabuzima umunani, amavuriro y’ibanze atatu, inzu z’ababyeyi ndetse unatanga amahugurwa ku bakozi bo mu rwego rw’ubuzima.
Izindi nkuru:
OMS yashyize hanze imibare igaragaza uko kanseri yica abana benshi mu bihugu bikennye.
Ebola ikomeje gusiga ubuzima bw’abaturage bo muri RDC mu kangaratete.
Kuki kugabanya amabere biri kurushaho kwamamara muri iki gihe?
Uko kugenda n’amaguru bifasha umuntu guhorana akanyamuneza
RCS yahakanye indwara y’Iseru mu Igororero rya Nyarugenge