Perezida wa Leta Zunze Ubumwe za Amerika, Donald Trump, yagaragaje Joe Biden yasimbuye ku butegetsi ari we wateye intambara yo muri Ukraine.
Donald Trump wahoze ari Perezida wa Leta Zunze Ubumwe za Amerika yavuze ko intambara iri hagati ya Ukraine n’u Burusiya yatangiye muri Gashyantare 2022 idakwiye kumwitirirwa, ahubwo ari iyatewe n’ubuyobozi bwa Joe Biden.
Mu kiganiro n’itangazamakuru, Trump yavuze ko iyo aba akiri Perezida, iyi ntambara itari kuba yarabaye. Yagize ati: “Iyi si intambara yanjye. Maze igihe gito ngarutse hano… Biden yahaye Ukraine miliyari nyinshi z’Amadolari. Ibyo ni ukwibeshya gukomeye. Iyo agira ubwenge – nubwo ntabufite – iyo ntambara ntiyari kuba.”
Trump yavuze ko Perezida w’u Burusiya, Vladimir Putin, yafashe icyemezo cyo gutangiza intambara kubera ko atubaha Biden, ndetse ko n’umubano hagati ya Biden na Perezida wa Ukraine, Volodymyr Zelensky, utigeze ugenda neza.
Yagaragaje impungenge z’ingaruka z’iyo ntambara, avuga ati: “Ubu hari miliyoni nyinshi z’abantu bapfuye kandi buri umwe muri bo yari akwiye kuba akiriho.”
Trump yanasubiye ku by’amatora yo mu 2020, avuga ko iyo atsinda, atari kwemera ko iyo ntambara itangira. Yashimangiye ko kimwe mu byo yiyemeje ari ukuyihagarika, nubwo yemeza ko hakiri inzitizi nyinshi mu kuyisoza.
