Instagram yiyemeje gufasha abantu bahanga ibyabo bwite no guhagarika abakoporora iby’abandi

Urubuga rwa Instagram rwatangaje amategeko mashya agiye gufasha abantu birushya bahanga udushya twabo, rukajya ruhagarika konti zimenyereye gufata iby’abandi zikabigira ibyazo.

Icyo Instagram igiye guhindura

Muri iki gihe, hari konti nyinshi zizwi nka “Aggregator accounts” (izi ni konti zidahanga ibintu bishya, ahubwo zikusanya amafoto n’amashusho by’abandi zikabishyira kuri paji zazo). Instagram yavuze ko izi konti zitazongera guhabwa imbaraga zo kumenyekana.

Ubusanzwe, hari uburyo imashini za Instagram zihitamo ibintu zereka abantu, ubwo buryo bwitwa “Algorithm“. Iyi Algorithm niyo ituma videwo yawe irebwa n’abantu benshi batagukurikira. Amategeko mashya avuga ko niba ufashe ifoto y’undi muntu ukayishyira kuri paji yawe nta kintu gishya wongeyeho, ya mashini (Algorithm) itazongera kuyereka abantu bashya.

Itandukaniro riri hagati yo ‘Kwiba’ no ‘Guhanga udushya’

Instagram yasobanuye neza ibintu bibiri abantu bakwiye kumenya:

• Igihangano cy’umwimerere: Iki ni igihangano wakoze wewe ubwawe, cyangwa ufashe icy’undi muntu ukagihindura mu buryo bugaragara. Ugereranyo: Niba ufashe videwo y’undi muntu ukayivangamo n’iyawe, ukayishyiraho ijwi ryawe cyangwa ukayihinduramo “Meme” (aya ni amashusho cyangwa amafoto asekeje akunze gukoreshwa kuri interineti), Instagram izabona ko hari akazi katoroshye wakoze, bityo iguhe agaciro.
• Gusubiramo iby’abandi: Niba ufashe videwo y’undi muntu ukayishyira paji yawe ukayihindurira umuvuduko gusa, cyangwa ugashyiraho ifoto y’ibyo undi muntu yanditse (Screenshot), Instagram izahita ibona ko atari ibyawe. Ibi bizatuma paji yawe idakura kuko itazerekanwa mu gice cya “Explore” (ahantu hagenewe kwerekanirwa amakuru

Ikirango cyerekana nyir’igihangano

Kugira ngo nyir’igihangano ahabwe icyubahiro, Instagram igiye kujya ishyiraho ikirango (Label) kigaragaza izina rya nyir’igihangano wa mbere. Ibi bizatuma abantu bose babona ko igihangano atari icyawe, ahubwo ko wagikuye ku wundi muntu.

Inyungu ku bakoresha Instagram mu Rwanda

Izi mpinduka ni nziza cyane ku bantu bo mu Rwanda bakora ibintu byabo bwite. Kurinda “Originality” (umwimerere w’ibintu) bizatuma abafotozi, abahanzi, n’abasetsi b’Abanyarwanda bamenyekana cyane, kuko ibyo bakoze bitazongera kwibwa n’izindi paji ngo zibitwareho icyubahiro.

Icyo Instagram ishaka ni uko abantu bose bagira umwete wo guhanga ibintu bishya (Content Creation) aho gukora “Copy-Paste” (gukoporora no kwomeka). Niba ushaka ko paji yawe ikura, koresha ubwonko bwawe uhange ibintu by’umwimerere.