Ukraine yibasiye ibikorwa bya peteroli n’ibya gisirikare i St. Petersburg mu gihe hafungurwaga inama mpuzamahanga iyobowe na Putin.

Perezida Volodymyr Zelensky yemeje ko ingabo za Ukraine zagabye ibitero ahantu h’ingezi mu Burusiya mu ijoro ryakeye, harimo ububiko bwa peteroli bwa St. Petersburg, ibikorwa bya gisirikare biri ku birindiro by’amato bya Kronstadt ndetse n’uruganda rukora ibikoresho bya gisirikare mu karere ka Tambov.

Ibi bitero byateje inkongi ikomeye hafi ya St. Petersburg, mu gihe uwo mujyi wari witegura kwakira Inama Mpuzamahanga y’Ubukungu ya St. Petersburg, ikunze kwitwa “Davos y’u Burusiya.”

Ingabo za Ukraine zagabye ibitero mu ijoro ryakeye ku bikorwa by’ingenzi bya gisirikare n’iby’ingufu biri mu Burusiya, birimo ububiko bwa peteroli bwa St. Petersburg, ibikorwa biri ku birindiro by’amato bya Kronstadt ndetse n’uruganda rw’inganda za gisirikare ruherereye mu karere ka Tambov, nk’uko byemejwe na Perezida Volodymyr Zelensky.

Mu gitondo cyo kuri uyu wa Gatatu, inkongi ikomeye y’umuriro yadutse i St. Petersburg nyuma y’uko abayobozi b’u Burusiya batangaje ko akarere ka Leningrad kagabweho igitero gikomeye cya drones. Ibinyamakuru byo mu Burusiya n’imiyoboro ya Telegram byavuze ko ububiko bwa peteroli bwa Petersburg Oil Terminal bwaba bwaribasiwe.

Guverineri w’Akarere ka Leningrad, Alexander Drozdenko, yavuze ko ubwirinzi bwo mu kirere bw’u Burusiya bwaburijemo igitero cyari kigizwe na drones 30. Mbere yari yatangaje ko drones eshatu zari zimaze guhanurwa mu kirere cy’ako karere.

Nubwo abayobozi b’u Burusiya batangaje ko drones nyinshi zahanuwe mbere yo kugera ku ntego zazo, amashusho yakwirakwijwe ku miyoboro ya Telegram yo mu Burusiya yagaragaje inkongi y’umuriro n’umwotsi mwinshi bizamuka mu gace kavugwamo icyambu cya St. Petersburg, aho bivugwa ko ari hamwe mu hantu hibasiwe n’ibyo bitero.

Umuyoboro wigenga wa Telegram witwa Astra watangaje ko wasesenguye amashusho menshi yafashwe n’abaturage maze ukemeza ko ahari hahiye ari ku kigo JSC Petersburg Oil Terminal, kimwe mu bigo binini byakira kandi bigatunganya ibikomoka kuri peteroli mu majyaruguru y’uburengerazuba bw’u Burusiya.

N’indi miyoboro y’amakuru yo mu Burusiya yatangaje ko icyo kigo cyaba cyaribasiwe n’igitero cya drones.

Nyuma y’ibyo bitero, abayobozi bashyize mu bikorwa gahunda y’umutekano izwi nka “Kover” ku Kibuga cy’Indege cya Pulkovo kiri i St. Petersburg, nk’uko byatangajwe n’itangazamakuru ryo mu Burusiya. Iyi gahunda yatumye ingendo z’indege zihungabana, aho bivugwa ko indege zirenga 10 zagombaga guhaguruka zakererewe cyangwa zirahagarikwa.

Abaturage batuye muri St. Petersburg batangaje ko bumvise urusaku rw’iturika ryinshi mbere y’uko babona umwotsi mwinshi n’inkongi y’umuriro bizamuka mu bice by’umujyi, ibintu byakurikiye ibitero byavugwaga ko byagabwe na drones.

Mbere y’uko habaho iturika ryumvikanye i St. Petersburg, imiyoboro ya Telegram yo mu Burusiya yari yatangaje ko habaye ikindi gitero gikekwa ko cyagabwe na drones mu Karere ka Tambov, gaherereye mu majyepfo y’uburasirazuba bwa Moscow.

Nk’uko ayo makuru abivuga, uruganda rwa Progress ruherereye mu mujyi wa Michurinsk rwibasiwe muri iryo joro, maze rufatwa n’inkongi y’umuriro.

Bivugwa ko uru ruganda rukora ibikoresho byihariye byo kugenzura no kuyobora ibikorwa bya gisirikare, birimo ibyifashishwa mu ndege za gisirikare ndetse no mu ikoranabuhanga rya misile.

Kugeza ubu, abayobozi b’u Burusiya ntibaratangaza mu buryo burambuye ingano y’ibyangiritse kuri uru ruganda rwa Progress.

Mu butumwa yashyize ku rubuga rwa Telegram, Perezida wa Ukraine, Volodymyr Zelensky, yashimye icyo gikorwa cya gisirikare cyakozwe ku bufatanye bw’Urwego rw’Ubutasi rwa Ukraine (SBU), Ingabo zikoresha indege zitagira abapilote (USF), Ingabo z’Ibikorwa Byihariye (SSO), Urwego Rushinzwe Kurinda Imipaka n’izindi nzego z’umutekano.

Zelensky yavuze ati: “Twabonye umusaruro mwiza w’ibikorwa byacu birebana n’ibitero birebire. Mu ijoro ryakeye, ibikorwa by’ingenzi biri ku butaka bw’u Burusiya byaribasiwe.”

Perezida Zelensky yemeje by’umwihariko ko ububiko bwa peteroli bwa St. Petersburg bwagabweho igitero, ashimangira ko buri ku ntera ya kilometero hafi 1.100 uvuye ku mupaka wa Ukraine.

Yagize ati: “Kuva ku mupaka wa Ukraine kugera kuri iki kigo cy’inganda za peteroli z’u Burusiya zifasha ibikorwa by’intambara, ni intera ya kilometero zigera ku 1.100. Nanone intego za gisirikare ziri ku birindiro bya Kronstadt zaragezweho.”

Perezida Volodymyr Zelensky yavuze kandi ko hari ikindi gitero cyagenze neza cyagabwe ku ruganda ruherereye mu Karere ka Tambov mu Burusiya, ruvugwaho kugira uruhare mu gukora intwaro zikoreshwa mu bikorwa bya gisirikare.

Yasobanuye ko uru ruganda ruri ku ntera ya kilometero hafi 600 uvuye ku murongo w’imirwano.

Zelensky yashimiye abasirikare ba Ukraine bagize uruhare muri ibyo bikorwa, avuga ko bagaragaje ubuhanga n’ubunyangamugayo mu kugera ku ntego zari zateganyijwe.

Yagize ati: “Ndashimira abasirikare bacu ku bw’ubunyamwuga n’ukuri bagaragaje. Gahunda ya Ukraine yo kugaba ibitero birebire ku bikorwa bifasha intambara iri gushyirwa mu bikorwa neza uko bikenewe kugira ngo amahoro yegerezwe abaturage.”

Igitero cyavuzweho cyabaye ku munsi hafungurwaga Inama Mpuzamahanga y’Ubukungu ya St. Petersburg (SPIEF), ikunze kwitwa “Davos y’u Burusiya”, kubera ko ari imwe mu nama zikomeye z’ubucuruzi n’ubukungu zitegurwa na Kremlin buri mwaka.

U Burusiya bukoresha iyi nama mu kwerekana ko ubukungu bwabwo bukomeje guhagarara neza nubwo bwafatiwe ibihano mpuzamahanga ndetse bugakomeza guhura n’igitutu cy’amahanga kubera intambara yo muri Ukraine. Nk’uko urubuga rw’iyi nama rubigaragaza, iteganyijwe kuva kuwa 3 kugeza kuwa 6 Kamena.

Mu gihe iyi nama yatangizwaga, Ukraine yakomeje gahunda yayo yise “ibihano bya peteroli”, igamije kwibasira ibikorwa by’u Burusiya bifitanye isano n’ingufu, birimo ububiko bwa peteroli, inganda zitunganya peteroli n’ububiko bw’ibikomoka kuri yo.

Kiev ivuga ko ibyo bikorwa ari ingenzi mu gutera inkunga no gukomeza ubushobozi bw’intambara bw’u Burusiya, bityo bikaba bikomeje kuba intego y’ibitero byayo.