SK FM yavuze ko itazongera gutangaza amakuru ya APR FC mu gihe kitazwi

Radio SK FM yatangaje ko itazongera gutangaza amakuru ajyanye na APR FC mu gihe kitazwi, isaba abafana b’iyi kipe kutazongera kuyitegereza ho amakuru yayo.

Ibi byatangajwe na Sam Karenzi, Umuyobozi wa SK FM akaba na nyirayo, mu kiganiro cya siporo “Urukiko rw’Ikirenga” cyatambutse kuri uyu wa Mbere tariki ya 21 Nzeri 2026.

Sam Karenzi yavuze ko SK FM yafashe umwanzuro wo kudakomeza kuvuga kuri APR FC, asaba imbabazi abafana b’iyi kipe bari bamaze ibyumweru hafi bitatu batumva amakuru yayo kuri iyi radio.

Ati: “Reka nsabe imbabazi abakunzi ba APR FC bagiye kumara ibyumweru bitatu batayumva hano kuri SK FM.”Yongeyeho ko abafana badakwiye gutegereza ko APR FC izongera kuvugwa kuri iyi radio mu minsi ya vuba, kuko ngo ari umurongo SK FM yafashe.

Ati: “Abafana ba APR FC bamaze ibyumweru bingana gutyo batayumva hano, reka mbasabe imbabazi kubera ko nta nubwo bazayumva hano vuba. Noneho biveho n’urujijo, ntabwo bazayumva hano vuba.”

SK FM ivuga ko ari umwanzuro wayo

Karenzi yavuze ko iki cyemezo atari amabwiriza bahawe n’ubuyobozi bwa APR FC, ahubwo ko ari umurongo SK FM ubwayo yahisemo gukurikiza.

Ati: “Ni umurongo twihaye tuzasigarana bacye bakunda amakipe 15 kongeraho n’abiri yo muri Sudani ukuyemo APR FC.”

Yasabye abafana ba APR FC bashaka gukomeza gukurikirana amakuru y’iyi kipe kuyashakira ahandi, kuko SK FM iteganya gukomeza kutayitangaho amakuru.

Ati: “Ntimuzategereze ngo wenda ejo turayivugaho cyangwa ejo bundi. Niba ukunda APR FC cyangwa ukeneye amakuru yayo utekereze ahandi hantu utangira kujya uyumvira.”

Karenzi ahakana ko ari APR FC yabasabye kutayivugaho

Sam Karenzi kandi yavuze ko iki cyemezo kitatewe n’uko ubuyobozi bwa APR FC bwaba bwarasabye SK FM kudatangaza amakuru yayo.

Yashimangiye ko ari umwanzuro wafashwe n’iyi radio ku mpamvu zayo bwite.

Karenzi yavuze ko mu gihe kiri imbere SK FM ishobora kongera gutangaza amakuru ya APR FC, ariko ko bizaterwa n’uko radio izabona ibintu bimeze ndetse n’uko izaba ihagaze ku bijyanye n’imikoranire cyangwa imyumvire yayo n’abantu bamwe bo muri APR FC.

APR FC ntacyo iratangaza

Kugeza ubu, APR FC nta tangazo cyangwa ibisobanuro birambuye iratangaza ku mwanzuro wa SK FM wo kudakomeza gutangaza amakuru yayo.

Ibi bituma impamvu nyayo iri inyuma y’uyu mwanzuro wa SK FM ikomeza gusobanurwa n’ubuyobozi bw’iyi radio, mu gihe APR FC yo itaragira icyo iwutangazaho ku mugaragaro.

SK FM ni imwe mu maradiyo akurikiranwa mu Rwanda mu biganiro bya siporo, aho amakuru n’ibiganiro ku makipe yo mu Rwanda bikunze kuba mu bigize ibiganiro byayo.