Abagabo babiri bo mu Karere ka Gatsibo batawe muri yombi nyuma y’uko umuturage wahawe akazi ko kuvidura ubwiherero bwari bumaze igihe budakoreshwa agwirwe n’itaka agahita apfa.
Iyi mpanuka yabaye mu ijoro rishyira ku wa 27 Nyakanga 2026, mu Kagari ka Marimba, Umurenge wa Kabarore, mu Karere ka Gatsibo.
Umunyamabanga Nshingwabikorwa w’Umurenge wa Kabarore, Rugaragavu Jean Claude, yavuze ko uwo muturage wari ufite imyaka 34 yari yahawe ikiraka cyo gucukura no kuvidura ubwiherero kugira ngo bakuremo ifumbire. Ageze mu bujyakuzimu bwa metero hafi esheshatu, inkuta z’ubwo bwiherero zarasenyutse, itaka rimugwira ahita ahasiga ubuzima.
Yasobanuye ko ubwiherero bwari bumaze igihe budakoreshwa, bikekwa ko ari imwe mu mpamvu zatumye inkuta zabwo zidafata neza maze zikagwira uwo mukozi.
Nyuma y’iyo mpanuka, inzego z’umutekano zahise zitangira iperereza, hafatwa abantu babiri barimo nyir’urugo n’uwari watsindiye ako kazi akakaha uwo muturage, kugira ngo hakorwe iperereza ku ruhare rwabo muri uru rupfu.
Gitifu Rugaragavu yasabye abaturage kwirinda gukora imirimo ishobora gushyira ubuzima bwabo mu kaga, cyane cyane iyo isaba ubuhanga n’ibikoresho byihariye.
Yagize ati, “Abaturage turabasaba kugira amakenga. Imirimo nk’iyi ishobora guteza impanuka ikwiye gukorwa n’ibigo cyangwa kompanyi zibifitiye uburambe n’ibikoresho, aho gushyira ubuzima bw’abaturage mu kaga.”
Umurambo wa nyakwigendera wajyanywe ku Bitaro bya Kiziguro kugira ngo ukorerwe isuzuma mbere yo gushyikirizwa umuryango we ngo ushyingurwe.
Inzego zibishinzwe zikomeje iperereza kugira ngo hamenyekane niba hari uburangare cyangwa amakosa yaba yaragize uruhare muri iyi mpanuka yahitanye ubuzima bw’uwo muturage.
Izindi nkuru:
Huye: Polisi yasabye abakora mu ibagiro gukaza ingamba zo kurwanya ubujura bw’amatungo
Huye: Umwana umwe yapfuye abandi babiri barakomereka mu nkongi y’umuriro yatewe n’amashanyarazi
Ruhango: Abasore bafashwe bamaze kwica ihene y’umuturage no kuyibaga
Umugabo wari ugiye gusengera ahatemewe mu mugezi wa Musogoro yabonetse yapfuye
Ruhango: Umugabo yatawe muri yombi akekwaho gusambanya umwana w’imyaka 15
Ngoma: Abakekwaho kwica umusaza bamushakaho amafaranga batawe muri yombi
Ngoma: Abarenga 60 bakekwaho ubujura n’ibindi byaha batawe muri yombi
Gatsibo: Umusore na nyina batawe muri yombi nyuma yo gukekwaho gutera amazirantoki kwa Mudugudu
Rutsiro: Abaturage basabwe gukaza amarondo nyuma y’ikorwa ry’ubujura bw’Ibendera ry’Igihugu
Ruhango: Polisi yafashe umugabo wari umaze kwiba miliyoni 1.7 Frw