Charlene Ruto yakowe Kajugujugu ebyiri, miliyari 7 z’amashilingi ya Kenya,bus ebyiri n’impeta y’agaciro gakomeye

Umuhango wo guhuza imiryango wa Charlene Ruto, umukobwa wa Perezida wa Kenya William Ruto, n’umushoramari w’Umutanzaniya Isaya Yunge, wakomeje kuvugisha benshi nyuma y’amakuru akomeje gukwirakwira ku mutungo uvugwa ko watanzwe mu rwego rwo gukwa.

Mu mafoto n’amakuru biri gukwirakwizwa ku mbuga nkoranyambaga, uyu muhango wagaragajwe nk’uwari wihariye kandi witabiriwe n’abantu bo mu miryango yombi. Icyatumye urushaho kuvugwa ni amakuru avuga ko Yunge yaba yaratanze miliyari 7 z’amashilingi ya Kenya, hakaba havugwamo ibintu bihenze birimo kajugujugu ebyiri na bus.

Kajugujugu ebyiri na bus byatumye inkuru iba agashya

Mu makuru ari gukwirakwizwa cyane, harimo avuga ko mu byo Isaya Yunge yaba yaratanze harimo kajugujugu ebyiri ndetse na bus yo mu bwoko buzwi nka ‘nganya’.

Ibi byatumye benshi ku mbuga nkoranyambaga batangira kwibaza ku bunini bw’umutungo wavuzwe muri uyu muhango, cyane ko gukwa hakoreshejwe ibintu nk’ibi bidakunze kumvikana mu nkuru zisanzwe z’ubukwe.

Amakuru amwe avuga ko ibyo byose byari bigize umutungo wavuzweho agaciro ka miliyari 7 z’amashilingi ya Kenya.

Impeta ya miliyoni zirenga 50 z’amashilingi iri mu byatangaje benshi

Inkuru ntiyagarukiye kuri kajugujugu na bus gusa.

Hari n’amakuru yakwirakwiye avuga ko Isaya Yunge yahaye Charlene Ruto impeta y’agaciro hafi miliyoni 56 z’amashilingi ya Kenya, ni ukuvuga hafi amadolari ya Amerika 433,000.

Iyi mpeta nayo yatangiye kuvugwa cyane kubera agaciro kayo kavugwa ko kari hejuru cyane.

Umuhango wa Koito wahuje imiryango

Charlene Ruto na Isaya Yunge bagaragaye mu muhango gakondo wa Koito, umuco wo mu muryango wa Kalenjin ugamije guhuza imiryango mu gihe cy’ubukwe.

Amafoto y’umuhango yakwirakwiye ku mbuga nkoranyambaga, agaragaza Charlene ari kumwe n’umukunzi we ndetse n’abagize umuryango wa Perezida William Ruto.

Uyu muhango watumye abantu benshi bashaka kumenya byinshi kuri Isaya Yunge, cyane cyane kubera ko ari umuntu ukora mu rwego rw’ikoranabuhanga n’imishinga y’ubucuruzi.

Isaya Yunge ni umushoramari uzwi mu ikoranabuhanga

Isaya Yunge si umuntu watangiye kumenyekana kubera umubano we na Charlene Ruto gusa.

Amakuru y’ibyerekeye umwuga we agaragaza ko ari umushoramari n’umuntu ukora mu ikoranabuhanga muri Tanzania. Yashinze SomaApps Technologies, ikigo cyibanze ku gukoresha ikoranabuhanga mu gutanga ibisubizo ku bibazo by’abaturage.

Yunge kandi yagiye agaragara mu rutonde rw’abanyafurika bakiri bato bafite uruhare mu ikoranabuhanga no mu guhanga udushya. The New Africa Magazine yamushyize mu bantu b’Abanyafurika bazamuka mu rwego rw’ikoranabuhanga.

Umubano we na Charlene Ruto wakomeje gukurura amatsiko

Kuba Isaya Yunge ari umushoramari wo muri Tanzania naho Charlene Ruto akaba ari umukobwa wa Perezida wa Kenya, byatumye umubano wabo ukurura cyane abantu mu bihugu byombi.

Icyakora, ibyamamare ndetse n’abana b’abakuru b’ibihugu bakunze gukurikiranwa cyane iyo bagize ibirori byihariye, bityo amakuru ajyanye n’ubukwe bwa Charlene na Yunge akomeje kwitabwaho n’abakoresha imbuga nkoranyambaga.

Inkuru y’uyu muhango rero ikomeje kuba imwe mu nkuru ziri gukurura amatsiko muri Afurika y’Iburasirazuba, cyane cyane kubera ubukwe bw’umukobwa wa Perezida wa Kenya n’umushoramari wo muri Tanzania, ndetse n’umutungo udasanzwe uvugwa ko waba warajyanye n’uwo muhango.