APR FC yanganyije na Etincelles inanirwa kwisubiza umwanya wa mbere

APR FC yanganyije na Etincelles FC ibitego 2-2 mu mukino w’umunsi wa 24 wa Shampiyona, inanirwa kwisubiza umwanya wa mbere ku rutonde rw’agateganyo rwa Shampiyona.

Ni umukino wabaye kuri iki cyumweru tariki ya 20 Mata 2025, kuri Kigali Pele Stadium.

APR FC yagiye gukina isabwa gutsinda ngo yisubize umwanya wa mbere kuko yarushwaga amanota abiri na Rayon Sports ya mbere.

Etincelles FC nayo yashakaga amanota yo gukomeza kuyifasha kwizera kuguma mu cyiciro cya mbere nta nkomyi.

APR FC yatangiye umukino isatira cyane izamu rya Etincelles FC ishaka igitego cya mbere harimo umupira Djibril Ouattara yinjiranye akinana na Ruboneka, awumusubije akinirwa nabi, ugarukira Ruboneka uwuhinduye mu izamu, Sy na Arsene bananirwa kuwutsinda ufatwa neza na Nishimwe Moise.

Ku munota wa 7,  Rutayisire Aman yakiniye nabi Lamine Bah, ikosa rihanwe na Ruboneka ashyira  umupira mu rubuga rw’amahina, Ouattara akinirwa nabi akubiswe ukuguru, umusifuzi atanga penaliti

Iyi Penaliti yinjijwe na Ouattara Cheikh Djibril, yuzuza igitego cya gatandatu muri Shampiyona yagezemo muri Mutarama 2025.

Ku munota wa 12, APR FC yasatiraga cyane yabonye amahirwe yo gutsinda igitego cya kabiri ku mupira Tuyisenge Arsene yananiwe gutsinda uwuhawe na Ruboneka, umunyezamu Nishimwe Moise arahagoboka.

Ku munota wa 25 yabonye uburyo bukomeye bwo kwishyura ku ikosa ryahanwe na Mukoghotya Robert rikozwe na Lamine Bah, ateye ishoti rikomeye rikurwamo na Ishimwe Pierre mbere y’uko Niyomugabo Claude akiza izamu.

Ku munota wa 28, APR FC yakoze impinduka Nshimiyimana Yunussu wavunitse, asimburwa na Aliou Souane.

Ku munota wa 37, Djibril Ouattara yinjiranye umupira mu ruhande, awuha Byiringiro Gilbert uwuhinduye imbere y’izamu, Mamadou Sy ashatse kuwutera yigaramye ujya ku ruhande.

Mbere y’uko Igice cya mbere kirangira, umusifuzi wa kane yongeyeho iminota itatu  y’inyongera.

Ku munota wa 45+1 Cheikh Djibril Ouattara yatsindiye APR FC igitego cya kabiri n’umutwe ku mupira wari uvuye muri koruneri yatewe na Ruboneka Bosco.

Uyu Munyaburukina Faso yuzuzaga ibitego birindwi muri Shampiyona.

Igice cya mbere cyarangiye APR FC yatsinze Etincelles ibitego 2-0 bya Cheikh Djibril Ouattara.

Mu igice cya kabiri, Etincelles yagarukanye imbaraga itangira ishaka kwishyura nibura igitego kimwe.

Ku munota wa 51 Etincelles FC yabonye uburyo bwo kwishyura ku ishoti rikomeye ryatewe ma Ishimwe Djabilu ari inyuma y’urubuga rw’amahina, Ishimwe Pierre arasimbuka, umupira awushyira muri koruneri.

Ku munota wa 54, Etincelles FC yakinaga neza yabonye penaliti ku mupira Ruboneka Bosco yakoze mu rubuga rw’amahina nyuma yo gukurwaho na Pitchou.

Iyo Penaliti yinjijwe neza na Nsabimana Hussein.

Ku munota wa 60, Etincelles yahushije igitego cyabazwe ku mupira Frank yinjiranye asize ba myugariro ba APR FC, ananirwa kuroba umunyezamu Ishimwe Pierre wari wasohotse, umupira awutera ku ruhande.

Ku munota wa 62, APR FC yakoze impinduka Mugisha Gilbert na Victor Mbaoma basimbura Mamadou Sy na Tuyisenge Arsene.

Ku munota wa 66, Ishimwe Pierre yongeye gutabara APR FC, akuramo umupira wari utewe na Kaweesa nyuma yo guherezwa na Ishimwe Djabilu.

Ku munota wa 78, Etincelles FC yabonye igitego cya kabiri cyinjijwe na Ishimwe Djabilu ku mupira mwiza yahawe mu rubuga rw’amahina, aroba umunyezamu Ishimwe Pierre.

Umukino warangiye APR FC inganyije na Etincelles FC ibitego 2-2.

APR FC yagumye ku mwanya wa kabiri n’amanota 49, irushwa inota rimwe na Rayon Sports ya mbere nyuma y’imikino 24 imaze gukinwa.

Undi mukino wabereye mu Karere ka Rubavu Rutsiro FC yatsinze Bugesera FC ibitego 4-2.

Izindi nkuru:

Minisitiri Nduhungirehe yahaye ikaze abafana ba Arsenal baturutse hirya no hino muri Afurika M23/AFC yahaye gasopo ingabo z’Abarundi Amafoto: Dore ibitego byiza APR inyagiye Rayon sport. Ese Mukura Victory Sport Yaba yatewe Mpaga na Rayon Sports ? APR FC inyagiye bikomeye ikipe ya Rutsiro ibitego umuba Umuvugizi wa M23 yaciye amarenga ku kuba bagiye gufatanya na Kabila Visit Rwanda: U Rwanda na Atletico Madrid basinye amasezerano yo kwamamaza Basketball: U Rwanda mu itsinda rikomeye mu gushaka itike y’igikombe cy’Isi Lamine Yamal agiye guhabwa nimero ya Messi Rayon Sports yahagaritse abatoza bayo mbere yo kujya i Huye, Ese bafite ubwoba cyangwa ? Copa de Rey: Irushanwa ry’abanyabigwi ryuzuyemo udushya twinshi. Umukino wa Bugesera FC na Rayon Sports uzakomereza ku munota wari ugezeho UEFA CL: PSG itsindiye Arsenal iwayo, itera intambwe igana ku mukino wa nyuma Seninga Innocent wahagaritwe na Etincelles FC yahakanye ibyo kunywa amayoga Rayon yahahwe amafaranga ngo yemere gukina umukino yari yarahiriye kutawukina Rayon Sports yohereje abatoza b’ikipe y’Abagore gutsinda Mukura DJ Ira yashyikirijwe ubwenegihugu bw’u Rwanda yahawe na Perezida Rayon Sports yaburijwemo imbere ya Mukura Victory Sport itegekwa gusubira i Huye PEACE CUP: APR FC yegukanye igikombe nyuma yo gutsinda Rayon Sports Umukino wahuzaga Mukura VS na Rayon Sports urasubitswe bitunguranye