Umuhanzi Okkama yatangaje ko yafashe icyemezo cyo kutazongera gukorana na Producer Element, avuga ko yagiye atinda kumuha indirimbo ku buryo byagize ingaruka ku rugendo rwe rw’umuziki.
Mu kiganiro aherutse kugirana n’itangazamakuru, Okkama yavuze ko icyemezo yafashe kidafitanye isano n’amakimbirane yihariye hagati ye na Element, ahubwo ko gishingiye ku buryo imishinga ye yagiye itinda kurangira cyangwa gusohoka uko yabiteganyaga.
Uyu muhanzi yavuze ko nubwo Element ari umwe mu batunganya indirimbo bubashywe mu Rwanda, abahanzi badakwiye gushyira icyizere cyabo cyose ku muntu umwe, kuko bishobora kubadindiza mu bikorwa byabo.
Yagaragaje ko hari igihe abahanzi baba bategereje indirimbo zabo igihe kirekire, bikagira ingaruka ku igenamigambi ryabo ndetse no ku iterambere ry’umwuga wabo.
Okkama yavuze ko ikibazo cyo gutinda kw’indirimbo atari we wenyine wagize, ashimangira ko hari n’abandi bahanzi bagiye bagaragaza impungenge nk’izo mu bihe bitandukanye.
Yagize ati: “Production nziza ntabwo iva ku izina gusa, iva ku muntu ukora akazi neza kandi ku gihe. Umuhanzi na we aba akeneye guteganya ibikorwa bye adategereje igihe kitazwi.”
Yafashe umwanzuro kuva mu 2023
Okkama yavuze ko umwanzuro wo guhagarika gukorana na Element atari mushya, kuko yawufashe kuva mu mwaka wa 2023, gusa icyo gihe ntiyari yarawutangaje ku mugaragaro.
Mu byo yatanzeho urugero harimo indirimbo ye yitwa “Walahi”, yavuze ko yamaze igihe kinini itarasohoka nk’uko yari abyifuza, ibintu byamusize yumva ko agomba gushaka ubundi buryo bwo gukomeza ibikorwa bye bya muzika.
Yashishikarije abahanzi gukorana n’abaproducer batandukanye
Yavuze ko aho gukomeza gutegereza, yahisemo gukorana n’abandi batunganya indirimbo kugira ngo ibikorwa bye bikomeze nta mbogamizi.
Okkama yagaragaje ko gukorana n’abatunganya indirimbo benshi bishobora gufasha umuhanzi kuvumbura andi mahirwe mashya ndetse n’ubundi buryo bwo guteza imbere impano ye.
Yavuze ko igihe umuhanzi yishingikirije ku muntu umwe gusa bishobora kumugora igihe habaye ikibazo icyo ari cyo cyose mu mikorere.
Ikibazo kimaze igihe kivugwa mu muziki nyarwanda
Ibi Okkama abitangaje mu gihe hari abandi bahanzi na bo bagiye bavuga ko bahuye n’ibibazo byo gutinda guhabwa indirimbo zabo na bamwe mu batunganya umuziki.
Aya magambo aje kandi mu gihe Okkama ari gukomeza kumenyekanisha album ye nshya yise “Nyamabara”, avuga ko ikubiyemo ubutumwa butandukanye bushingiye ku byo yagiye abona mu ruganda rw’umuziki nyarwanda.
Kugeza ubu, Producer Element ntabwo aragira icyo atangaza kuri ibi birego bishya byatanzwe na Okkama.
Src: BTN
Izindi nkuru:
Visit Rwanda: U Rwanda na Atletico Madrid basinye amasezerano yo kwamamaza
Bruce Melodie na The Ben basabye abafana gushyigikira ubumwe mu muziki nyarwanda
Umukino wahuzaga Mukura VS na Rayon Sports urasubitswe bitunguranye
Shema Fabrice agiye kwiyamamariza kuyobora FERWAFA
Yampano yisobanuye ku byaha aregwa, Ubushinjacyaha busaba ko afungwa iminsi 30
Rayon Sport igiye kugarura Bakame nk’umunyezamu
Ni Ubumuntu! Liverpool izakomeza kwishyura umushahara wa Diogo Jota
Umuhanzi Yampano yavuze amagambo akomeye k’umugore we
The Ben yateguje indirimbo nshya ‘Inshallah’ mbere ya Summer Country Tour
Inkindi Aisha yavuze ukuri ku mubano we na M. Iréné nyuma y’itangazwa ry’ubukwe bwe