U Rwanda rwihaye intego yo kugabanya 50% by’impanuka zo mu muhanda bitarenze imyaka ine.

U Rwanda rwatangaje ko rwiyemeje kugabanya ku kigero cya 50% impanuka zo mu muhanda mu myaka ine iri imbere, binyuze mu gukomeza gushyira mu bikorwa ingamba zigamije kunoza umutekano wo mu muhanda no kurinda ubuzima bw’abawukoresha.

Ibi byatangajwe na Ambasaderi w’u Rwanda mu Muryango w’Abibumbye, Martin Ngoga, mu nama mpuzamahanga yiga ku mutekano wo mu muhanda iri kubera ku cyicaro cy’Umuryango w’Abibumbye i New York kuva kuwa 20 kugeza ku wa 21 Nyakanga 2026.

Iyi nama yahuje abayobozi bakuru, impuguke n’abafatanyabikorwa batandukanye bo hirya no hino ku Isi, bagamije kungurana ibitekerezo no gushaka ibisubizo birambye byafasha kugabanya impanuka zo mu muhanda n’ingaruka zikomoka kuri zo.

Mu ijambo rye, Ambasaderi Ngoga yashimye uruhare rw’Ikigega cy’Umuryango w’Abibumbye gishinzwe Umutekano wo mu Muhanda (United Nations Road Safety Fund) mu gushyigikira gahunda z’u Rwanda zo kugabanya impanuka no kongera umutekano ku bakoresha umuhanda.

Yagaragaje ko u Rwanda rumaze gutera intambwe igaragara muri uru rwego binyuze mu gushyiraho uburyo bwuzuye bwo guhangana n’impanuka zo mu muhanda. Muri bwo harimo gukomeza gushimangira amategeko agenga ikoreshwa ry’umuhanda no guhana abayarenzeho.

Yavuze kandi ko igihugu cyakajije ibikorwa byo kugenzura imyitwarire y’abatwara ibinyabiziga, hagamijwe gukumira amakosa akunze guteza impanuka, ndetse no kongera imbaraga mu ishyirwa mu bikorwa ry’amategeko agenga umutekano wo mu muhanda.

U Rwanda kandi rukomeje gushora imari mu kubaka no kunoza ibikorwa remezo byifashishwa n’abakoresha umuhanda, birimo imihanda y’abanyamaguru, ibimenyetso byo ku muhanda n’ibindi bikoresho bifasha kugabanya impanuka.

Byongeye kandi, ubukangurambaga bugamije gushishikariza abaturage kubahiriza amategeko y’umuhanda no kugira imyitwarire myiza mu kuwukoresha bukomeje gushyirwa imbere nk’imwe mu nkingi z’ingenzi zifasha kugera kuri iyi ntego.

U Rwanda rugaragaza ko ubufatanye hagati ya Leta, abafatanyabikorwa ndetse n’abaturage ari bwo buzatuma rugera ku ntego rwihaye yo kugabanya impanuka zo mu muhanda ku kigero cya 50% mu myaka ine iri imbere.

Hari kandi gushimangirwa uruhare rw’ibihugu mu gushyigikira gahunda mpuzamahanga zigamije kunoza umutekano wo mu muhanda, by’umwihariko ishyirwa mu bikorwa ry’Intego ya 3.6 y’Intego z’Iterambere Rirambye, igamije kugabanya ku kigero cya 50% impfu n’ibikomere biterwa n’impanuka zo mu muhanda. Abitabiriye inama banahamagarirwa gukomeza ubufatanye no kongera ishoramari mu bikorwa byongera umutekano wo mu muhanda.

Iyi nama kandi itanga urubuga rworohereza ibihugu gusangira ubunararibonye, gutegura ingamba zihuriweho no gukomeza gushimangira ubushake bwa politiki mu guhangana n’impanuka zo mu muhanda, zikomeje kuba kimwe mu bibazo bikomeye bihitana abantu benshi ku rwego mpuzamahanga.