Hasohotse amadarubindi akoranye ikoranabuhanga rihambaye

Sosiyete ya Brilliant Labs ifite icyicaro gikuru mu gihugu cya Singapore, yashyize hanze ubwoko bw’amadarubindi y’ikoranabuhanga yiswe “Halo AI Glasses“, yakozwe mu buryo bugezweho hifashishijwe ubwenge buhangano bwa “Noa AI“, bushobora kumva, kureba no gusobanukirwa ibyo buri kubona cyangwa bwumva, hanyuma bugatanga ibisubizo bijyanye n’ibiri kuba ako kanya ku muntu uyambaye.

Aya madarubindi mashya yaje yiyongera ku bikoresho by’ikoranabuhanga bikomeje guhindura uburyo abantu babaho ndetse bakorana n’ibikoresho by’ubwenge buhangano mu buzima bwa buri munsi.

Imiterere yayo

Ayo madarubindi afite imiterere isa cyane n’amadarubindi azwi nka Ray-Ban Wayfarer, gusa yo aboneka mu ibara rimwe ry’umukara utijimye cyane. Akaba yaratangiye gushyirwa ku isoko mu mpera za Ugushyingo 2025.

Ikoranabuhanga rya microOLED n’amashusho y’amabara

Aya madarubindi afite ubushobozi bwihariye bwo kwerekana amashusho ku kirahure gito cya ‘microOLED’ gifite ubunini bwa inch 0.2, kikerekana amakuru mu buryo bw’amabara meza kandi busobanutse.

Bitandukanye n’andi madarubindi y’ikoranabuhanga asanzwe akoresha amajwi gusa, Halo yo ifite uburyo bwo guhuza amashusho n’amajwi mu buryo bw’ikoranabuhanga rigezweho, ku buryo uyambaye ashobora kubona ibisobanuro cyangwa amakuru y’ako kanya atabanje gukoresha telefone cyangwa mudasobwa.

Uko Noa AI ikora muri Halo

Brilliant Labs yavuze ko Noa AI yubatswe muri aya madarubindi ishobora gusesengura ibyo camera yayo ibona ndetse n’ibyo micro yayo yumva, hanyuma igatanga ibisubizo byihuse nk’aho umuntu ari kuganira n’undi muntu.

Ibi bivuze ko umuntu ashobora kubaza ayo madarubindi ikibazo cyangwa kuyasaba ubufasha, maze agasubiza ako kanya hashingiwe ku byo yabonye cyangwa yumvise.

Amajwi yumvwa n’uyambaye gusa

Aya madarubindi kandi afite ikoranabuhanga ry’amajwi ryihariye ku buryo amajwi yumvwa gusa n’uyambaye, kabone nubwo yaba ari kumwe n’abandi bantu.

Batiri yayo nayo iri mu zitezweho gukora igihe kirekire kuko ishobora kumara amasaha 14 yose bitewe n’uko camera yayo ikoresha umuriro muke ugereranyije n’andi madarubindi y’ikoranabuhanga ari ku isoko.

Nubwo Halo asa nk’aremereye, afite uburemere bwa garama 40 gusa, ibintu Brilliant Labs ivuga ko bizatuma yorohera abayambara igihe kinini.

Narrative AI ifasha abafite ikibazo cyo kwibuka

Mu bindi bishya byitezwe muri aya madarubindi harimo uburyo bwa Narrative AI buzajya bukusanya amakuru ava kuri camera, micro ndetse n’ibiganiro, bugakora ububiko bw’amakuru bwihariye kandi butekanye.

Iri koranabuhanga rizafasha cyane abantu bafite ikibazo cyo kwibuka cyangwa kutabona neza, kuko rizajya ribibutsa amazina y’abantu bahuye na bo, ibyo bavuganye cyangwa ibindi bikorwa bakoze mbere.

Harimo uburyo bwa “Vibe Mode”

Brilliant Labs yavuze kandi ko hari ubundi buryo bushya buri kugeragezwa bwitwa Vibe Mode, buzafasha abantu gukora porogaramu cyangwa kugenzura ibikorwa runaka bakoresheje amabwiriza y’ijwi gusa.

Aya madarubindi ya Halo AI ari mu bikoresho bishya byitezweho guhindura uburyo abantu bakoresha ubwenge buhangano mu buzima bwa buri munsi, cyane cyane mu itumanaho, kwibuka amakuru no kubona ibisobanuro byihuse mu gihe nyacyo.