Mu rukundo, kutumvikana no kurakaranya bishobora kubaho, ariko uburyo abantu babiri bakemura amakimbirane ni bwo bugena niba urukundo rwabo rukomeza gukomera cyangwa rugatangira kuzamo agatotsi.
Hari igihe ushobora gukosa umukunzi wawe ukabona ko gusaba imbabazi bitoroshye, cyane cyane iyo wumva ko amagambo wabwira uwo muntu atabona uko asubiza ibyababaje. Icyakora, kwemera ikosa no gusaba imbabazi bivuye ku mutima bishobora gufasha cyane mu kugarura umubano mwiza.
Dore uburyo bune bwagufasha gusaba imbabazi umukunzi wawe, mukongera kubana neza kandi urukundo rwanyu rugasubirana ibyishimo.
1. Ca bugufi imbere y’umukunzi wawe
Iyo wamenye ko wakoze ikosa, ikintu cya mbere gikenewe ni ukureka ubwibone no kwicisha bugufi.
Nubwo ushobora kumva ko ikosa wakoze rikomeye ku buryo wabuze aho uhera usaba imbabazi, ntibikwiye gutuma ukomeza kwigira nk’aho nta cyabaye. Ahubwo gerageza kwegera umukunzi wawe umwereke ko wumva ko wamubabaje kandi ko wifuza ko ibintu bisubira mu buryo.
Rimwe na rimwe, n’iyo amagambo yaba akomeye kuyabona, uburyo ureba umukunzi wawe, uko umuvugisha ndetse n’uko umwiyegereza bishobora kumwereka ko wicuza.
Guca bugufi ntibisobanuye ko uba uri umuntu udafite agaciro. Ahubwo bishobora kugaragaza ko ushyira agaciro ku mubano wanyu kuruta gutsimbarara ku ishema ryawe.
2. Emera ikosa wakoze
Umuntu usaba imbabazi by’ukuri agomba kubanza kwemera ko yakoze ikosa.
Niba wabwiye umukunzi wawe nabi, wamubabaje cyangwa wakoze ikindi kintu waje kubona ko kitari gikwiye, banza wisuzume umenye neza aho wibeshye.
Iyo umaze kubimenya, ntukwiye gukoresha amagambo asa n’aho usaba imbabazi ariko ugashaka no kwerekana ko amakosa atari ayawe.
Urugero, ushobora kumubwira uti: “Rwose narengereye, ntabwo nagombaga kugukorera cyangwa kukubwira ibyo nakubwiye muri ubwo buryo. Ndicuza kuba narakubabaje.”
Amagambo nk’aya agaragaza ko usobanukiwe neza icyatumye umukunzi wawe ababazwa, aho kuvuga gusa ngo “mbabarira niba wababaye.”
Kwemera ikosa bishobora gutuma uwo musaba imbabazi yumva ko amarangamutima ye wabayumvise kandi ko ibyo wakoze utabifata nk’ibintu bidafite agaciro.
3. Ba inyangamugayo kandi uvuge bikuvuye ku mutima
Imbabazi nziza ntizigomba kuba amagambo wavuze gusa kugira ngo impaka zirangire. Zikwiye kuba zituruka ku mutima.
Niba wisuzumye ugasanga koko wahemukiye umukunzi wawe cyangwa wamukomerekeje, reka amarangamutima yawe agaragare mu buryo bwubaka.
Murebe, umutege amatwi kandi umuhe umwanya wo kuvuga uko yumvise ibyo wamukoreye. Ntukihutire kumuca mu ijambo cyangwa kumuhatira guhita yibagirwa ibyamubabaje.
Ushobora kumubwira uti: “Ndabizi ko ibyo nakoze byakubabaje kandi ndabyicuza. Ntabwo nashakaga ko ibintu bigera kuri aha, ariko nemera ko nari nkiri mu makosa. Ndifuza ko twakongera tukaganira tukabikosora.”
Iyo imbabazi zivuye ku mutima, akenshi zigaragarira no mu bikorwa bikurikiraho. Niba wakoze ikosa runaka, gerageza no kwirinda kurisubira.
4. Irinde kwiregura mu gihe usaba imbabazi
Kimwe mu bintu bishobora gutuma gusaba imbabazi bihinduka indi ntambara ni ukuvanga imbabazi no kwiregura.
Urugero, kuvuga uti: “Mbabarira kuba narakubwiye nabi, ariko nawe ni wowe wanteye uburakari.” Bishobora gutuma umukunzi wawe yumva ko utari kwemera ikosa ryawe.
Iyo wahisemo gusaba imbabazi, banza wibande ku ikosa wakoze n’ingaruka ryagize ku wundi muntu.
Ibi ntibivuze ko utazigera uvuga uko nawe wiyumvaga cyangwa ngo muganire ku byabaye byose. Ahubwo, niba hari ibyo ushaka gusobanura, bishobora gukorwa nyuma y’uko mwese mutuje kandi mukiteguye kuganira mutongera kurwana.
Gusaba imbabazi si ugutsindwa. Ni uburyo bwo kugaragaza ko ushobora kwemera ikosa, kubaha amarangamutima y’umukunzi wawe no gukora ibishoboka kugira ngo ikosa ritazongera kubaho.
Imbabazi zigomba kujyana n’impinduka
Kuvuga “mbabarira” ni intambwe nziza, ariko iyo bikurikiwe n’ibikorwa ni bwo bigira agaciro kurushaho.
Niba wifuza ko umubano wanyu wongera kuba mwiza, gerageza kumva neza icyababaje umukunzi wawe, wemere uruhare rwawe mu makimbirane, usabe imbabazi utaryarya kandi ugaragaze mu bikorwa ko wifuza guhinduka.
Iyo bombi biteguye kumva no kubabarirana, amakimbirane ashobora kuba amahirwe yo kwiga uko barushaho kubahana, kuvugana no gukomeza urukundo rwabo.
Izindi nkuru:
Uko Wakwitandukanya n’Umukunzi Ugukoresha mu Nyungu Ze
Dore Impamvu Umukunzi Wawe Atuma Uba Umuntu Mwiza Kurushaho
Uko Kwibuka Ibihe Byiza Byabaye Bituma Abashakanye Barushaho Guhuza
Iyo Abantu Babiri Bagukunda, dore uko Wakora Amahitamo Utazicuza
Ibyo umukobwa ashobora gukora bigatuma umusore bakundana yifuza kumugira umugore