Inkuru Itunguranye: Kevin Kade Ntazagaragara muri MTN Iwacu Muzika Festival 2026

Abakunzi b’umuziki nyarwanda bari biteze kubona umuhanzi Ngabo Richard uzwi nka Kevin Kade mu bitaramo bya MTN Iwacu Muzika Festival 2026, babonye inkuru itunguranye nyuma y’uko hatangajwe ko atazitabira iri serukiramuco kubera ibibazo by’ubuzima.

Aya makuru yashyizwe ahagaragara ku wa 15 Kamena 2026 binyuze mu itangazo ryasohowe n’inzu ireberera inyungu z’uyu muhanzi, YEEBAA Music. Iri tangazo ryagaragaje ko Kevin Kade ari gukurikiranwa n’abaganga ndetse yafashe icyemezo cyo gukurikiza inama z’ubuvuzi kugira ngo abashe kugarura ubuzima bwe mu buryo bwuzuye.

Ibi bivuze ko uyu muhanzi atazabasha kwitabira ibitaramo bya MTN Iwacu Muzika Festival biteganyijwe gutangira ku wa 20 Kamena 2026, mu gihe hari hasigaye iminsi mike ngo iri serukiramuco ritangire.

Ni ku nshuro ya mbere Kevin Kade yari agiye kwitabira ku mugaragaro uru ruhererekane rw’ibitaramo rumaze kuba kimwe mu bikorwa bikomeye bya muzika mu Rwanda. Abakunzi be benshi bari bitezwe kumubona ku rubyiniro nyuma y’imyaka myinshi bamugaragariza urukundo binyuze mu bihangano bye bitandukanye.

Nubwo uyu mwaka wari waramushyize ku rutonde rw’abahanzi bazataramira muri MTN Iwacu Muzika Festival, si ubwa mbere izina rye rigaragaye muri iri serukiramuco ritagezweho. Mu mwaka wa 2025 na bwo yari yatangajwe mu bahanzi bazaryitabira, ariko nyuma aza kubivamo kubera indi gahunda mpuzamahanga yari yitabiriye muri Leta Zunze Ubumwe za Amerika.

Icyo gihe Kevin Kade yari yatoranyijwe mu bahanzi bazaririmba muri Rwanda Convention USA, igikorwa cyabereye muri Amerika ku wa 5 Nyakanga 2025, bituma adashobora guhuza izo gahunda zombi.

Mu itangazo ryashyizwe hanze, YEEBAA Music yavuze ko iki ari igihe kigoye ku muhanzi wari ufite amatsiko menshi yo kongera guhura n’abakunzi be bo hirya no hino mu gihugu. Icyakora, bashimangiye ko nta kintu cyagombaga gushyirwa imbere y’ubuzima bwe.

Bagaragaje ko nubwo kubura muri ibi bitaramo bishobora gutenguha abakunzi be, ari icyemezo cyafashwe hagamijwe kurinda ubuzima bwe no kumuha umwanya uhagije wo gukira neza mbere yo gusubira ku rubyiniro.

Abamureberera inyungu banashimiye abategura MTN Iwacu Muzika Festival uburyo bagaragaje ubufatanye n’ubwumvikane muri iki kibazo.Banashimiye abakunzi ba Kevin Kade bakomeje kumwoherereza ubutumwa bwo kumwihanganisha, kumusengera no kumushyigikira muri iki gihe ari kunyuramo.

Basabye abafana gukomeza kumuba hafi no kumwifuriza gukira vuba, bagaragaza icyizere ko azagaruka mu bikorwa bya muzika afite imbaraga nshya kandi yiteguye gukomeza gutanga ibyishimo nk’ibyo amenyereweho.

Kevin Kade ni umwe mu bahanzi bagezweho mu Rwanda, cyane cyane mu njyana ya Afrobeat na R&B. Mu myaka ishize yagiye asohora indirimbo zakunzwe cyane n’abatari bake, ibintu byamufashije kwigarurira imitima y’abakunzi ba muzika haba mu Rwanda no hanze yarwo.

Mbere gato y’itangazwa ry’aya makuru, Kevin Kade yari aherutse gushyira hanze indirimbo nshya yise “Ndi Ready”, yakiriwe neza n’abakunzi be ndetse ikomeza gucurangwa ku maradiyo no ku mbuga zicururizwaho umuziki.

Ku rundi ruhande, MTN Iwacu Muzika Festival 2026 iracyakomeje imyiteguro yo gutangira nk’uko byateganyijwe. Biteganyijwe ko iri serukiramuco rizazenguruka Intara zitandukanye z’u Rwanda kuva ku wa 20 Kamena kugeza ku wa 1 Kanama 2026.

Ibitaramo bizabera mu Turere turindwi ari two Huye, Ngoma, Nyagatare, Karongi, Muhanga, Musanze na Rubavu, aho ibihumbi by’abakunzi ba muzika bitegerejwe kuzitabira no gususurutswa n’abahanzi batandukanye bazaba bagize uru rugendo rw’umuziki.

Nubwo Kevin Kade atazaba ari muri ibi bitaramo, abakunzi be benshi bafite icyizere ko azakira vuba akagaruka ku rubyiniro mu bihe biri imbere, akomereza aho yari agejeje ibikorwa bye bya muzika.