Beterave iri mu biribwa bikomeje kwitabwaho n’abahanga mu by’imirire kubera intungamubiri nyinshi iyifashamo kurinda indwara zitandukanye. Uretse kuba ikoreshwa mu mitobe n’amasalade, beterave ifasha umubiri kugumana ubuzima bwiza bw’umutima, umwijima ndetse ikagira uruhare mu ikorwa ry’amaraso.
Beterave ni uruboga rukungahaye ku ntungamubiri zitandukanye zirimo potassium, fer, vitamin A, vitamin B-6 ndetse n’ibinyabutabire bizwi nka antioxydants. Izi ntungamubiri zifasha umubiri gukora neza no kugabanya ibyago byo kwibasirwa n’indwara zimwe na zimwe.
Abahanga mu by’imirire bagaragaza ko potassium iboneka muri beterave ifasha kugabanya umuvuduko ukabije w’amaraso, bityo ikagira uruhare mu kurinda umutima. Beterave kandi igabanya ibinure bibi bya cholestérol bishobora gutera indwara zifata imitsi n’umutima.
Iyi mboga inakungahaye ku binyabutabire bya antioxydants birwanya iyangirika ry’uturemangingo tw’umubiri. Muri byo harimo bétanine, flavonoïdes n’ibindi bifasha kugabanya ibyago byo kwandura kanseri zimwe na zimwe no kurinda umubiri kwibasirwa n’indwara ziterwa n’uduce twangiza.
Ku bijyanye n’ubuzima bw’amaso, ibibabi bya beterave bishobora gutekwa cyangwa bikaribwa muri salade. Birimo lutéine na zéaxanthine, bifasha amaso gukora neza no kuyarinda ibibazo bijyana no gusaza.Beterave kandi ni isoko nziza ya fer, intungamubiri y’ingenzi mu ikorwa ry’amaraso.
Kubura fer bishobora gutera ikibazo cy’amaraso make ndetse n’umunaniro ukabije uterwa no kubura umwuka mwiza wa oxygen mu mubiri. Kuyishyira ku mafunguro ya buri munsi bishobora gufasha mu gukumira ibyo bibazo.
Ikindi ni uko beterave ifasha umwijima gukora neza akazi kawo ko kweza no gusohora imyanda mu mubiri. Antioxydants, vitamin A, vitamin B-6 na fer biyibonekamo bifasha kurinda umwijima kwangirika no kuwongerera ubushobozi bwo gukora neza.
Abahanga bagira inama abantu kurya beterave mu buryo butandukanye, yaba itetswe, muri salade cyangwa mu mutobe, kugira ngo babone inyungu zayo ku buzima bw’umubiri.
Izindi nkuru:
Menya ibiribwa bishobora guteza ibibazo iyo bivanze nabi
Umuneke: Urubuto rwifitemo intungamubiri zifasha umutima, ubwonko n’igogorwa
Akamaro ko Kunywa Amazi Mu Buzima bwa Buri Munsi.
Sobanukirwa akamaro k’ubuki ku buzima n’ibyo ukwiye kwitondera
Sobanukirwa ibimenyetso simusiga byakwereka ko uri kugira isukari nyinshi mu mubiri
Watermelon: Imbuto yoroshye ariko ifite akamaro gatangaje ku buzima bw’imibonano mpuzabitsina
Impamvu Abaganga Bashishikariza Abantu Gukora Imyitozo Ngororamubiri .
Ibintu bitanu ukwiye gukora kugira ngo ukomeze kubungabunga ubuzima bwiza bw’umwijima wawe
Uko kugenda n’amaguru bifasha umuntu guhorana akanyamuneza
Menya ibyiza byo kurya igihaza ku buzima bwawe