Komisiyo y’Umutwe w’Abadepite ishinzwe gukurikirana imikoreshereze y’imari n’umutungo bya Leta (PAC) yatangaje ko izakomeza gukurikirana ishyirwa mu bikorwa ry’inama yatanze ku nzego zagaragayemo amakosa mu micungire y’umutungo wa Leta, hagamijwe gukomeza kubazwa inshingano no kunoza imiyoborere.
Ibi byagarutsweho nyuma y’uko inzego zitandukanye za Leta zitumijwe gusobanura ibibazo byagaragajwe muri raporo y’Umugenzuzi Mukuru w’Imari ya Leta.
Uturere n’ibitaro byasobanuye amakosa byagaragayemo
Mu nzego zatanze ibisobanuro harimo Akarere ka Muhanga, kasobanuye ibibazo byagaragaye mu micungire y’amasoko ya Cyakabiri na Nyabisindu
Akarere ka Rusizi na ko kemeye ko habaye intege nke mu ishyirwa mu bikorwa ry’umuhanda wa Gihundwe–Busekanka ndetse no mu ikurikiranabikorwa rya gahunda ya Girinka.
Ibitaro bya Nyabikenke, Ibitaro bya Rwinkwavu, hamwe n’Uturere twa Bugesera na Gakenke na byo byemeye ko hari ibibazo byagaragajwe muri raporo y’Umugenzuzi Mukuru, bivuga ko byatangiye gufata ingamba zo kubikosora.
PAC: Intego si ugushinja, ahubwo ni ukubaza inshingano
Depite Muhakwa yavuze ko intego yo guhamagaza abayobozi mu ruhame atari ukubasebya cyangwa kubashyira mu majwi, ahubwo ari uburyo bwo kubabaza inshingano no guteza imbere imicungire myiza y’umutungo wa Leta.
Yasobanuye ko ibi bifasha gukoresha neza amafaranga ava mu misoro y’abaturage no kongera umuco wo kubazwa inshingano mu nzego za Leta
Gukurikirana ishyirwa mu bikorwa ry’inama bizakomeza
Depite Muhakwa yashimangiye ko akazi ka PAC katarangirira ku kumva ibisobanuro by’inzego zitandukanye, ahubwo ko Komisiyo izakomeza gukurikirana niba amakosa yagaragajwe yarakosowe n’inama zatanzwe zarashyizwe mu bikorwa.
Yagize ati: “Ntabwo bizarangirira aha. Tuzakomeza kubikurikirana kugira ngo turebe niba koko aho amakosa yakozwe yarakosowe kandi inama twatanze zarashyizwe mu bikorwa.”
Depite Muhakwa yagaragaje ko kubaza abayobozi mu ruhame ari imwe mu nzira zo guteza imbere gukorera mu mucyo no kongera ubunyangamugayo mu micungire y’umutungo wa Leta.
Yavuze ko ubu buryo bushobora gufasha inzego zibishinzwe kuryoza ababaye nyirabayazana b’amakosa, bityo umutungo wa Leta ugakoreshwa neza kandi ugatanga umusaruro ku baturage.
Izindi nkuru:
RIB Yihanangirije Ababyeyi n’Abarimu Bahana Abana Mu Buryo Bukabije
Gakenke: Ikamyo ikoze impanuka ikomeye
Ikubuga k’indege cya Bugesera cyagenewe akayabo
Nshimiyimana Emmanuel ukekwaho kwica umugore we yafashwe n’abanyerondo.
Imipaka ya Rusizi yafunzwe by’agateganyo kubera Ebola
Rusizi: Yatawe muri yombi nyuma yo kwangiza Parike
Gakenke: Umwarimu Yakomeretse Bikomeye Nyuma yo Gupfa Intebe n’Umunyeshuri
U Rwanda Rwakiriye Abandi Bimukira 173 Baturutse muri Libya Basaba Ubuhungiro
Muhanga: Polisi y’u Rwanda yasabye urubyiruko rw’abakorerabushake kugira uruhare mu gukumira ibyaha
Imipaka ya Rubavu na Goma yafunzwe by’agateganyo kubera ‘Ebola’