Gakenke: Umwarimu Yakomeretse Bikomeye Nyuma yo Gupfa Intebe n’Umunyeshuri

Mu Karere ka Gakenke habereye inkuru yateye benshi impungenge nyuma y’uko umunyeshuri akomerekeje umwarimu akoresheje ikaramu, bapfuye intebe bombi bashakaga kwicaraho mu gihe cy’ikizamini. Ibi byabereye ku Kigo cy’Amashuri cya G.S Cyanika giherereye mu Murenge wa Coko.

Ibi byabaye ku wa 23 Kamena 2026, ubwo umwarimu witwa Gakoza Emmanuel yari ari gukoresha ikizamini cy’abanyeshuri. Mu rwego rwo gushaka intebe yakwicaraho, yasabye abanyeshuri kwicara ari batatu ku ntebe imwe kugira ngo haboneke indi ntebe yakoresha.

Umwe mu banyeshuri witwa Niyikiza ntiyabyumvise kimwe n’umwarimu we. Yavuze ko bidashoboka ko abanyeshuri bicara ari batatu ku ntebe imwe mu gihe hari indi ntebe itarimo umuntu.

Nyuma y’uko uyu munyeshuri agaragaje kutemeranya n’icyemezo cy’umwarimu, Gakoza Emmanuel yafashe umwanzuro wo kumusohora mu ishuri adakoze ikizamini.

Amakuru avuga ko Niyikiza ageze ku muryango w’ishuri yahise ahindukira, ajomba umwarimu ikaramu ku itama, ibintu byamuviriyemo gukomereka bikomeye.

Nyuma y’iyo mpanuka, umwarimu yahise ajyanwa ku Bitaro bya Nyange kugira ngo ahabwe ubuvuzi bwihuse.

Inzego Zafashe Icyemezo Kidasanzwe, nyuma y’ibyabaye, ubuyobozi bw’ishuri bufatanyije n’ubw’Umurenge wa Coko bwafashe icyemezo cyo kugarura umunyeshuri ku ishuri kugira ngo akomeze gukora ibizamini.

Icyakora, hafashwe umwanzuro ko ikibazo cye kizigwa nyuma y’ibizamini, kugira ngo hamenyekane ibihano bikwiye gufatwa.

Ubuyobozi Bw’Akarere Bwabivuzeho

Umuyobozi Wungirije w’Akarere ka Gakenke ushinzwe Imibereho Myiza y’Abaturage, Uwamahoro Marie Thérèse, yavuze ko nubwo umunyeshuri yemerewe gukomeza gukora ikizamini, ibyo yakoze bidashobora kwirengagizwa.

Yasobanuye ko inzego zibifitiye ububasha zamaze gutangira gukurikirana iki kibazo kuko ibikorwa yakoze bifatwa nk’icyaha.

Yagize ati:”Uriya munyeshuri na we inzego zibifitemo ububasha ziramukurikirana kuko yakoze icyaha.”

Ubutumwa Ku Banyeshuri N’Abarimu

Uwamahoro Marie Thérèse yasabye abanyeshuri gukomeza kubaha abarimu babo no gukemura amakimbirane mu nzira zubahiriza amategeko n’indangagaciro z’ishuri.

Yanibukije abarimu ko na bo bafite inshingano zo kubaha abanyeshuri no gukoresha uburyo bwubaka mu gukemura ibibazo bishobora kuvuka hagati yabo.

Iki kibazo cyabereye muri G.S Cyanika cyongeye kwibutsa akamaro k’ubworoherane, kubahana no gukemura amakimbirane mu mahoro mu mashuri. Nubwo umunyeshuri yemerewe gukomeza gukora ibizamini, ategerejweho gukurikiranwa n’inzego zibishinzwe kugira ngo hamenyekane ibihano bikwiye ku byo yakoze.