Menya amakuru y’ingenzi ku bihangano bitatu biteganyijwe gushyirwa mu Karere ka Karongi.

Akarere ka Karongi kagiye gushyira ibihangano nyabugeni bitatu ahantu h’ingenzi ku mihanda yinjira mu mujyi, hagamijwe kugaragaza umwihariko wako no guteza imbere ubukerarugendo.

Ibi bihangano bizubakwa mu isantere ya Rubengera, ku bwinjiriro bw’Umujyi wa Karongi uturutse i Rubengera, ndetse no muri rond-point iri imbere y’Ibitaro bya Kibuye. Umuyobozi w’Akarere ka Karongi, Muzungu Gerald, yavuze ko bamaze igihe bashakisha abafatanyabikorwa bazafasha mu kubyubaka no kwemeza ko bishushanya neza indangagaciro n’ubukungu bw’akarere.

Igihangano kizashyirwa imbere y’Ibitaro bya Kibuye kizagaragaza ubukerarugendo bwo mu misozi, amaterasi y’indinganire n’isumo ry’amazi, byerekana ibyiza nyaburanga bya Karongi. Ni cyo gihangano kitarabonera umufatanyabikorwa wo kugitera inkunga.

Ku bwinjiriro bw’umujyi wa Karongi hazashyirwa igishushanyo cy’umuntu utwaye ubwato, kigaragaza ubukerarugendo bwo ku Kiyaga cya Kivu ndetse n’inganda zikora ubwato zikorera muri aka karere. Iki gikorwa kizakorwa na Afrinest Engineering, uruganda rusanzwe rukorera ubwato i Karongi.

Mu isantere ya Rubengera na ho hazubakwa igihangano cy’umuhinzi usarura ikawa hamwe n’umugore ukoresha ikoranabuhanga, bishushanya ubufatanye hagati y’abahinzi n’ibigo by’imari mu guteza imbere ubukungu. Iki gihangano kizaterwa inkunga na Inkunga Finance Plc, ifite icyicaro gikuru muri Rubengera.

Abayobozi bavuga ko ibi bihangano bizafasha kurushaho kwamamaza ibyiza bya Karongi, gukurura ba mukerarugendo no guha isura nziza umujyi. Biteganyijwe ko bizuzura bitwaye asaga miliyoni 150 Frw, buri kimwe kikazatwara miliyoni 50 Frw.

Karongi yiyongera ku tundi turere twamaze gushyiraho ibihangano nk’ibi birimo Rubavu, Muhanga, Rwamagana, Kayonza na Kicukiro, mu rwego rwo kugaragaza umwihariko wabyo no guteza imbere ubukerarugendo.