Argentina yasezereye u Bwongereza igera ku mukino wa nyuma w’Igikombe cy’Isi

Ikipe y’Igihugu ya Argentina yageze ku mukino wa nyuma w’Igikombe cy’Isi cya 2026 nyuma yo gutsinda u Bwongereza ibitego 2-1 mu mukino wa ½ wabaye ku wa 15 Nyakanga 2026.

Uyu mukino wari utegerejwe na benshi kubera amateka akomeye ari hagati y’ibi bihugu byombi mu marushanwa mpuzamahanga. U Bwongereza bwatangiye neza, bubona igitego cya mbere maze busa n’aho bugenzura umukino mu minota myinshi.

Nubwo byari bimeze bityo, Argentina ntiyacitse intege. Mu minota ya nyuma y’umukino, Enzo Fernández yatsinze igitego cyo kwishyura, agarura icyizere mu bakinnyi ndetse no mu bafana bayo bari benshi mu kibuga.Nubwo byari bimeze bityo, Argentina ntiyacitse intege. Mu minota ya nyuma y’umukino, Enzo Fernández yatsinze igitego cyo kwishyura, agarura icyizere mu bakinnyi ndetse no mu bafana bayo bari benshi mu kibuga.

Mu gihe benshi bibwiraga ko amakipe yombi agiye kwerekeza mu minota y’inyongera, Lautaro Martínez yatsinze igitego cy’intsinzi mu minota ya nyuma, ahesha Argentina intsinzi y’ibitego 2-1 ndetse n’itike yo gukina umukino wa nyuma.

Kapiteni Lionel Messi yongeye kugaragaza ubunararibonye bwe muri uyu mukino, afasha bagenzi be kugera ku ntsinzi ikomeye. Ku myaka 39, Messi yongeye kugera ku mukino wa nyuma w’Igikombe cy’Isi, ibintu byatumye abafana ba Argentina barushaho kugira icyizere cyo kongera kwegukana igikombe.

Muri uru rugendo rwo kugera ku mukino wa nyuma, Argentina yabanje kuyobora itsinda J, mbere yo gukuramo Cape Verde, Misiri na Suisse mu mikino ya kamarampaka.

Nyuma yo gusezerera u Bwongereza, Argentina izahura na Espagne ku mukino wa nyuma uzakinwa ku wa 19 Nyakanga 2026. Espagne yo yageze kuri uwo mukino nyuma yo gutsinda u Bufaransa ibitego 2-0 mu wundi mukino wa ½.

Abakunzi b’umupira w’amaguru ku Isi yose bategerezanyije amatsiko uyu mukino wa nyuma uzahuza amakipe abiri yitwaye neza muri iri rushanwa, buri imwe ishaka kwandika amateka mashya mu Gikombe cy’Isi cya 2026.