Perezida wa Rayon Sports, Murenzi Abdallah, yatangaje ko iyi kipe yamenyeshejwe n’Impuzamashyirahamwe ya Ruhago muri Afurika (CAF) ko itemerewe gukina irushanwa rya CAF Confederation Cup mu gihe itarishyura amafaranga ibereyemo uwahoze ari umukinnyi wayo Souleymane Daffé ndetse n’uwahoze ari umutoza wayo Afahmia Lotfi.
Kuva muri Werurwe 2026, Rayon Sports iri ku rutonde rw’amakipe yabujijwe kwandikisha abakinnyi bashya muri FIFA nyuma yo gutsindwa zimwe mu manza yarezwemo n’abari abakozi bayo.
Murenzi Abdallah yavuze ko ubuyobozi bushya bwasanze ikipe ifite ibibazo byinshi birimo imanza zayiganishije muri CAF na FIFA.
Yagaragaje ko kuva batangira inshingano zabo bamaze kwishyura hafi miliyoni 30 Frw z’amadeni y’abakinnyi n’abatoza basezerewe mu buryo bwateye amakimbirane.
Yavuze ko Souleymane Daffé, wakiniye Rayon Sports amezi atandatu gusa, agomba kwishyurwa miliyoni 23 Frw nyuma yo kurega iyi kipe kubera kutubahirizwa kw’amasezerano yari afitanye na yo.
Ati: “CAF yatumenyesheje ko tudashobora kwemererwa gukina CAF Confederation Cup tutarakemura ikibazo cya Daffé.”
Rayon Sports kandi ifitanye ikibazo n’uwahoze ari umutoza wayo Afahmia Lotfi, na we ugomba kwishyurwa hafi miliyoni 20 Frw. Perezida wa Rayon Sports yavuze ko bagerageje kugirana ibiganiro na we kugira ngo bumvikane, ariko ikibazo cy’amikoro make gituma bitagenda neza, bituma dosiye igera muri CAF.
Mu rwego rwo gushaka ibisubizo birambye by’amikoro, Rayon Sports yamaze kugirana amasezerano y’ubufatanye na Banki ya Kigali (BK) azamara imyaka itanu. Aya masezerano ategerejweho gufasha iyi kipe gukemura ibibazo by’amadeni ndetse no kongera ubushobozi bwayo mu bikorwa bya buri munsi.
Ubuyobozi bwa Rayon Sports buvuga ko kuri ubu nta mukinnyi n’umwe wo mu makipe y’abagabo n’abagore uberewemo imishahara, uretse uduhimbazamushyi dutandukanye tutarishyurwa.
Izindi nkuru:
RSSB Tigers yabaye ikipe ya mbere yo mu Rwanda itwaye BAL.
Abanyamakuru b’imikino Cedro Keza na Alan Ruberwa berekeje kuri Radio&Tv 10.
Amavubi akomereje imyiteguro muri Misiri nyuma y’ihagarikwa ry’imikino ya gicuti yari kubera muri Maroc
Igikombe cy’Isi cya 2026 kigiye gutangira mu minsi mike
Kigali igiye kwakira CECAFA Wazee 2026 ihuza ibyamamare byahoze muri ruhago
Andoni Iraola Yagizwe Umutoza Mushya wa Liverpool Asimbuye Arne Slot
Impaka ku kudahanwa kwa Messi zakomeje kuvugisha benshi
José Mourinho agiye gusubira muri Real Madrid.
Bwa mbere muri Africa umusifuzi agiye gukoresha Camera ihambaye.
PSG igeze k’umukino wa nyuma wa UEFA Champions League yikurikiranya.