Neymar Jr yasezeye umupira w'amaguru, nyuma yo gutsindwa na Norway 2-1.

Nyuma y’imyaka isaga 15 ari umwe mu bakinnyi b’ikirangirire ku isi, Neymar Jr yatangaje ko asezeye ku mupira w’amaguru nk’uwabigize umwuga, ashyira akadomo ku rugendo rwaranzwe n’ubuhanga budasanzwe, ibikombe byinshi ndetse n’ibihe byamugoye birimo imvune zakurikiranye.

Neymar da Silva Santos Júnior, uzwi cyane nka Neymar Jr, yavukiye muri Brazil maze atangira kumenyekana akiri muto akinira ikipe ya Santos FC. Impano ye yatumye yegukana ibikombe bitandukanye mbere yo kwimukira muri FC Barcelona mu 2013, aho yakinanaga na Lionel Messi na Luis Suárez bagize ubusatirizi bw’igitangaza bwiswe “MSN”.

Mu 2015, Neymar yafashije Barcelona gutwara igikombe cya UEFA Champions League, La Liga n’Igikombe cy’Umwami wa Esipanye, ibintu byamushyize mu bakinnyi beza ku isi.

Mu 2017, yaciye agahigo ko kuba umukinnyi waguzwe amafaranga menshi kurusha abandi igihe yimukiraga muri Paris Saint-Germain F.C. avuye muri Barcelona ku mafaranga agera kuri miliyoni 222 z’ama-euro. Muri Paris Saint-Germain yegukanye ibikombe byinshi byo mu Bufaransa ndetse afasha iyi kipe kugera ku mukino wa nyuma wa Champions League mu 2020.

***Neymar Jr ku mukino we wa nyuma mu ikipe y’igihugu ya Brazil***.

Mu 2023 yimukiye muri Al Hilal SFC, ariko imvune zikomeye zatumye atabona umwanya uhagije wo gukina. Nyuma y’aho yongeye gusubira muri Santos FC, ikipe yamureze, aho yarangirije urugendo rwe nk’uwabigize umwuga.

Ku rwego rw’igihugu, Neymar yabaye umwe mu bakinnyi bakomeye bambariye ikipe y’igihugu ya Brazil. Yafashije Brazil kwegukana umudali wa zahabu mu mupira w’amaguru mu mikino Olempike ya 2016 yabereye i Rio de Janeiro, ndetse aza no kuba umwe mu batsinze ibitego byinshi mu mateka y’iyi kipe, aho yatsinze ibitego 80.

Mu butumwa bwe bwo gusezera, Neymar yashimiye Imana, umuryango we, abafana, abatoza, abo bakinnye hamwe n’amakipe yose yamubaye hafi, avuga ko n’ubwo asezeye gukina, urukundo afitiye umupira w’amaguru ruzahoraho.

***Neymar yasutse amarira nyuma yo gutsinda igitego Norway k’umunota w’ijana(100)***

Nubwo urugendo rwe rwaranzwe n’imvune zagiye zimubangamira mu myaka ya nyuma, Neymar azahora yibukwa nk’umwe mu bakinnyi bafite ubuhanga budasanzwe bwo guconga ruhago, gutsinda ibitego no gutanga imipira yavagamo ibitego, ibintu byamugize icyitegererezo ku bakinnyi benshi bakiri bato. Neymar Jr yatsinze ibitego 450 birimo 80 mu ikipe y’igihugu na 370 mu makipe.

Izina rya Neymar rizakomeza kubaho mu mateka ya ruhago y’isi nk’umwe mu bakinnyi beza Brazil yigeze kugira ndetse no mu banyempano badasanzwe bagaragaye mu kinyejana cya 21.