Papa Leo XIV yavuze ko siporo uretse kubaka umuntu, ihuza amahanga ikanateza imbere ubuzima

Papa Leo XIV yashimangiye ko siporo idakwiye gufatwa nk’uburyo bwo guhatanira ibikombe cyangwa intsinzi gusa, ahubwo ko ari ishuri ryigisha indangagaciro zubaka umuntu, rikamufasha kugira ubuzima bwiza haba ku mubiri, mu mitekerereze no mu mibereho ye, ndetse rikagira uruhare mu guhuza abantu n’amahanga.

Ibi yabitangaje mu butumwa yagejeje ku bagize Ishyirahamwe ry’Umukino wo Koga mu Butaliyani ndetse n’abakinnyi bitabiriye amarushanwa mpuzamahanga ya Sette Colli Trophy, yabereye i Roma mu Butaliyani kuwa 25 Kamena 2026.

Papa yavuze ko siporo ifasha umuntu kurenga ubushobozi bwe bwa buri munsi, ikamwigisha kwihangana, gukorera hamwe no kubaha abandi.

Yagaragaje ko mu marushanwa nyayo, umukinnyi aba ahanganye n’intege nke ze mbere yo guhangana n’abandi, bityo siporo ikaba ifasha umuntu gukura mu mico no mu myitwarire.

Ati: “Siporo ntabwo yubaka umubiri gusa, yubaka n’umuntu wese mu buryo bwuzuye, ikamutoza ubwitange, ubufatanye n’ubunyangamugayo.”

Siporo ifasha urubyiruko kubaka ejo hazaza

Papa Leo XIV yavuze ko urubyiruko rukwiye gukoresha siporo nk’inzira yo kwiteza imbere aho kuyifata nk’uburyo bwo gushaka ibyamamare gusa.

Yasobanuye ko imyitozo ihoraho yigisha umuntu kwihangana, kwakira intsinzi mu bwiyoroshye no kutacika intege igihe atsinzwe.

Yongeyeho ko amasomo umuntu akura muri siporo amufasha no mu buzima busanzwe, haba mu kazi, mu muryango no mu kubana n’abandi.

Umukino wo koga ufite ubusobanuro bwihariye

Papa yanagarutse ku mukino wo koga, avuga ko ufite ubusobanuro bwihariye kuko amazi ari kimwe mu bimenyetso bifite agaciro gakomeye mu buzima bw’umuntu.

Yasobanuye ko kuba umuntu yoga mu mazi bishobora kumwibutsa inkomoko y’ubuzima ndetse n’akamaro ko kubana neza n’ibidukikije.Ku bakirisitu, yavuze ko amazi anafite igisobanuro gikomeye kubera Isakaramentu rya Batisimu, risobanura ubuzima bushya n’ukuvuka bushya mu kwemera.

Siporo ihuza abantu baturutse imihanda itandukanye

Papa Leo XIV yashimye uburyo amarushanwa mpuzamahanga ahuza abantu bafite indimi, imico n’ibihugu bitandukanye, ariko bose bagahurira ku ntego imwe yo guhatana mu mahoro no kubahana.

Yavuze ko siporo ari ururimi rwumvikanwaho n’abatuye Isi yose, kandi ishobora kuba kimwe mu bikomeye bifasha kubaka amahoro n’ubuvandimwe hagati y’amahanga.Yashimangiye ko isi ikeneye urubyiruko rufite umutima wa siporo, rushyira imbere ubufatanye aho gushyira imbere amakimbirane.

Yasabye abakinnyi gukomeza kuba intangarugeroPapa Leo XIV yasabye abakinnyi gukomeza kurangwa n’imyitwarire myiza haba mu kibuga no hanze yacyo.

Yabibukije ko ibikombe n’imidali bishira, ariko indangagaciro umuntu akura muri siporo zikomeza kumubera umusingi mu buzima bwe bwose.

Yabasabye gukomeza kuba urugero rwiza ku rubyiruko no gukoresha impano zabo mu guteza imbere ubumwe, amahoro n’iterambere ry’abaturage.

Yasoje agaragaza ko siporo ikwiye gukomeza kuba imwe mu nzira zubaka umuntu wuzuye, ufite ubuzima bwiza, uzi kubana n’abandi kandi ugira uruhare mu kubaka isi irangwa n’ubwumvikane n’amahoro.

Src: Inyarwanda