Urukiko rwo muri Leta Zunze Ubumwe za Amerika rwategetse sosiyete Apple kwishyura miliyari 5,7 z’amadolari ya Amerika nyuma y’uko inteko iburanisha isanze yarakoresheje ikoranabuhanga rya ‘vibration’ ryari rifitwe na Taction Technology.
Taction Technology, sosiyete ikora ibikoresho by’amajwi birimo na ecouteur, yari yarareze Apple mu 2021, iyishinja gukoresha mu bikoresho byayo ikoranabuhanga ryari ririnzwe n’uburenganzira ku buvumbuzi.
Ikoranabuhanga rikoreshwa muri iPhone na Apple Watch
Ikoranabuhanga ryavugwaga muri uru rubanza rifasha igikoresho gukora ihinda cyangwa kunyeganyega ku buryo uwagikoresha abimenya.
Urugero ni igihe umuntu yakiriye ubutumwa kuri telefoni cyangwa akoze kuri buto, igikoresho gishobora kunyeganyega cyangwa gutanga umwumvire runaka umumenyesha ko hari igikorwa kibaye.
Taction Technology yavuze ko Apple yakoresheje ubu buvumbuzi mu kunoza uburyo abakoresha ibikoresho byayo babukoramo, ariko ko itabanje kuyihabwa uburenganzira.
Apple ntiyemera umwanzuro
Apple yahakanye ibyo yashinjwaga, ivuga ko ikoranabuhanga ryayo rya ‘Taptic Engine’ ritandukanye n’irya Taction Technology.
Sosiyete yavuze kandi ko itemera amafaranga yaciwe kandi ko izajuririra iki cyemezo cy’urukiko.
Uru rubanza rwari rumaze imyaka myinshi. Mu 2023, umucamanza wo mu Mujyi wa San Diego yari yarafashe umwanzuro uvuga ko Apple itabangamiye uburenganzira bwa Taction Technology kuri iryo koranabuhanga.
Icyo cyemezo cyaje kujuririrwa, urubanza rusubirwamo, maze inteko iburanisha ifata umwanzuro ushyigikira Taction Technology.
Apple ntishinjwa kuba yarabikoze ibizi
Nubwo inteko iburanisha yemeje ko Apple yakoresheje ikoranabuhanga rya Taction Technology, ntiyemeje ko Apple yabikoze ibizi cyangwa ibifite umugambi wo kubikora.
Iki cyemezo cyatumye Apple isabwa kwishyura Taction Technology miliyari 5,7 z’amadolari, mu gihe Apple ikomeje guteganya kujuririra uwo mwanzuro.
Uru rubanza rugaragaza akamaro ko kubahiriza uburenganzira ku buvumbuzi n’ikoranabuhanga, cyane cyane mu gihe sosiyete ikoresha cyangwa iteza imbere ikoranabuhanga ryakozwe n’undi.
Izindi nkuru:
WhatsApp yazanye amavugurura mashya y’umutekano, Dore uko konti yawe izarindwa
Ivugururwa rishya rya mudasobwa rigiye koroshya akazi no kongera umutekano w’abayikoresha.
U Rwanda rugiye kwigisha AI mu mategeko, abanyeshuri bazatozwa kuburana mu Isi y’ikoranabuhanga
Instagram yashyizeho uburyo bushya bwa ‘First Draft’ bugiye koroshya gutunganya Reels
Umunyarwanda yashyizeho uburyo bwo gukatisha itike ya bisi utiriwe ujya kuri gare
ChatGPT Yamanutse Munsi ya 50% by’Abakoresha AI
Meta yugarijwe n’urubanza rukomeye ruyishinja gukoresha Facebook na Instagram mu gukurura abakiri bato
AMRV Igiye kuzana Amakamyo akoresha Amashanyarazi no kubaka Uruganda ruyateranya mu Rwanda
Ikoranabuhanga mu Rwanda: Ingamba nshya zo kurinda abana ihohotera n’imikoreshereze mibi ya murandasi
TikTok yinjiye mu mugambi udasanzwe wo guhiga abashyira abana mu kaga kuri internet