Uko Poronogarafi, Imbuga Nkoranyambaga n’Amatangazo Byahinduye Uko Abagore Bareba Imibiri Yabo

Mu myaka mirongo ishize, igitutu ku bagore cyo kugira imiterere runaka y’ibihimba byabo by’igitsina cyagiye cyiyongera, bitewe n’amashusho ya poronogarafi, imbuga nkoranyambaga, kwamamaza serivisi z’ubwiza ndetse n’umugenzo wo gukuraho umusatsi wo ku mubiri.

Buhoro buhoro, hagiye hubakwa ishusho y’umugore ufatwa nk’ufite umubiri “utunganye”: udafite ubwoya, woroshye, utagira iminkanyari, ufite ibara runaka kandi udafite impumuro.

Umuganga w’indwara z’abagore, Sophie Berville, avuga ko iyi shusho yatangiye kurushaho kugaragara mu myaka ya 2000, ku buryo bamwe batangiye kuyifata nk’igipimo cy’ubwiza.

Imbuga nkoranyambaga zishobora kongera igitutu ku bakiri bato

Ikibazo gikomeye ni uko abakiri bato bashobora kutabona amakuru ahagije abereka ko imiterere y’ibihimba by’igitsina by’abagore ishobora gutandukana cyane, kandi ko ubwo butandukanye ari ibisanzwe.

Mu 2024, The Guardian yasubiyemo ibyavuye mu bushakashatsi bwakorewe muri Australia. Bwerekanye ko mu bantu bafite hagati y’imyaka 18 na 24, 23% bavuze ko bumva bafite impungenge cyangwa isoni z’uko ibihimba byabo by’igitsina bigaragara.

Muri abo bantu, hafi kimwe cya kabiri bari baratekereje ko bashobora kubihindura bakoresheje uburyo bwo kubagwa.

Ibi byerekana uburyo ishusho umuntu ahura na yo kenshi ku mbuga nkoranyambaga cyangwa mu zindi nzego z’itangazamakuru ishobora kugira uruhare mu buryo yibona.

Bamwe bavuga ko kubagwa byabahaye icyizere

Nubwo bimeze gutyo, ntabwo buri mugore uhitamo guhindura imiterere y’ibihimba bye by’igitsina aba yarabitewe n’amatangazo cyangwa amashusho ya porunogarafiya.

Sophie Berville yabwiye Le Monde ko hari abakiriya be baba bamaze imyaka myinshi batishimiye uko ibihimba byabo bigaragara.

Bamwe ngo bagira isoni zo kwiyambika imbere y’abo bakundana, ndetse hakaba n’abirinda imibonano mpuzabitsina kubera uko biyumva ku mubiri wabo.

Uyu muganga avuga ko hari bamwe mu bakozwe babaga bavuga ko nyuma yaho bumvise baruhutse mu mutwe ndetse n’ubuzima bwabo bw’imibonano mpuzabitsina bukarushaho kumera neza.

Ibi bituma ikibazo kidakwiye kurebwa gusa nk’icyo kubaga cyangwa kutabaga.

Ikibazo cy’ingenzi ni ukumenya niba umuntu utekereza kubagwa aba asobanukiwe neza impamvu abishaka, ingaruka zishobora kubaho, ndetse niba ari icyemezo yafashe ku bushake bwe bwite.

Abaganga baraburira ku ishusho itangwa na internet

Ikigo cy’Abanyamerika cy’Abaganga b’Indwara z’Abagore n’Ububyaza, ACOG, cyagiye kiburira ku ngaruka zishobora guterwa n’imbuga nkoranyambaga ndetse n’amashusho ya porunogarafiya mu buryo abantu babona imibiri yabo.

Iyo umuntu ahora abona ishusho imwe y’umubiri ifatwa nk’“utunganye”, ashobora gutangira kwibwira ko umubiri we usanzwe ufite ikibazo.

Ikindi ni uko ubushakashatsi ku mutekano n’akamaro k’ibikorwa byinshi byo kubaga cyangwa guhindura imiterere y’ibihimba by’igitsina by’abagore ku mpamvu z’ubwiza bukiri buke.

Umubiri w’umugore wagiye uva ku kintu gitinywa ukaba ubutumwa bwo kwigaragaza

Ikibazo cy’umubiri w’umugore ntikigarukira ku buvuzi gusa. Mu myaka ishize, abahanzi n’abaharanira uburenganzira bw’abagore bagiye bakoresha umubiri w’umugore mu gutanga ubutumwa bujyanye n’ubwisanzure, uburenganzira bwo kwifatira ibyemezo n’uko sosiyete ibona abagore.

Mu 1969, umuhanzi w’Umunya-Austalia Vali Export yakoze igikorwa cy’ubuhanzi cyari kigamije gutuma abantu bahura n’umubiri w’umugore mu buryo butandukanye n’uko bawubonaga mu mashusho cyangwa mu bikorwa by’ubucuruzi.

Mu myaka ya 1970, abahanzi baharaniraga uburenganzira bw’abagore batangiye gukoresha amashusho y’ibihimba by’igitsina by’abagore mu bihangano byabo, bagamije kuganira ku buryo abagore bafatwa, uko imibiri yabo ibonwa ndetse n’uburenganzira bwo kwifatira ibyemezo ku mibiri yabo.

Judy Chicago ni umwe mu bahanzi bagize uruhare muri uwo murongo w’ubuhanzi.

Ibikorwa byo kwigisha abantu ko imiterere y’imibiri itandukanye

Mu 2011, umuhanzi Jamie McCartney yatangije umushinga uzwi nka “The Great Wall of Vagina”, wakozwe hifashishijwe ibishushanyo by’ibihimba by’igitsina by’abagore bigera kuri 400.

Intego yari ukugaragaza ko imiterere y’ibihimba by’igitsina by’abagore itandukanye cyane, bityo ko nta shusho imwe ishobora kuvugwaho ko ari yo “isanzwe” cyangwa “itunganye”.

Mu 2016, hatangijwe “Vulva Gallery”, urubuga rwerekana uburyo ibihimba by’igitsina by’abagore bishobora kugira imiterere itandukanye.

Mu 2019, i Londres mu Bwongereza hatangijwe Musée du Vagin, inzu ndangamurage igamije kwigisha abantu ku mubiri w’umugore, ubuzima bw’abagore ndetse n’uko sosiyete yagiye iwubona mu bihe bitandukanye.

Ubutumwa bukomeye: nta shusho imwe y’umubiri w’umugore

Uyu munsi, ibihimba by’igitsina by’abagore biragenda bigarukwaho mu biganiro rusange, ariko impamvu z’ibyo biganiro zarahindutse.

Abaharanira uburenganzira bw’abagore babikoresha mu kurwanya isoni zishingiye ku mubiri, mu gihe abahanzi babikoresha mu kugaragaza uburenganzira bwa buri muntu bwo kwifatira ibyemezo ku mubiri we.

Ikibazo ntikigomba kuba gusa ukumenya uko igihimba cy’igitsina cy’umugore “gikwiye” kugaragara.

Ahubwo ni ugusobanukirwa ko imibiri y’abagore itandukanye, kandi ko ubwo butandukanye ari igice gisanzwe cy’imiterere ya muntu.

Isomo kuri buri wese

Umubiri w’umuntu ntugomba kugereranywa n’amashusho aboneka kuri internet cyangwa mu bikorwa by’ubucuruzi.

Umugore ashobora kugira imiterere itandukanye n’iy’undi mugore, kandi ibyo ntibivuze ko umwe afite umubiri “mwiza” kurusha undi.

Icy’ingenzi ni ukugira amakuru yizewe, kumenya umubiri wawe, no gufata ibyemezo bireba umubiri wawe usobanukiwe neza inyungu n’ingaruka zabyo.