Mu rwego rwo kurushaho kurengera ubutaka no kongera umusaruro w’ubuhinzi, Guverinoma y’u Rwanda yashyizeho itegeko rishya riteganya ibihano ku bahinzi batubahiriza amabwiriza agenga ubuhinzi. Iri tegeko rigamije gukumira ibikorwa byangiza ubutaka no guteza imbere ubuhinzi burambye buzafasha igihugu kugera ku ntego zacyo z’umutekano w’ibiribwa.
Abayobozi bagaragaza ko uburyo bwo guhinga budakurikije amategeko butagira ingaruka ku muhinzi gusa, ahubwo bushobora no kwangiza ubutaka, amazi ndetse n’umusaruro w’abahinzi baturanye. Ni yo mpamvu hafashwe icyemezo cyo gushyiraho ibihano bizafasha gukangurira abahinzi kubahiriza amabwiriza yashyizweho.
Bimwe mu bikorwa bishobora gutuma umuhinzi ahanishwa birimo kutubahiriza uburyo bwemewe bwo kubungabunga ubutaka, guhinga mu buryo buteza isuri cyangwa ubundi buryo bushobora kwangiza umutungo kamere igihugu gishingiraho.
Umuyobozi wasobanuye iby’iri tegeko yavuze ko kurengera ubutaka ari inshingano za buri muhinzi kuko ari bwo shingiro ry’ubuhinzi burambye.
Yagize ati: “Niba uburyo uhinga bwangiriza abandi, uzabihanirwa.”
Yasobanuye ko ubutaka bwangiritse bufata imyaka myinshi kugira ngo bwongere gutanga umusaruro nk’uko byari bisanzwe, bityo kwirinda ibikorwa bibwangiza bikaba ari inyungu rusange.
Ibihano bizatangira gutangwa nyuma yo gusobanurira abaturage
Leta ivuga ko mbere yo gutangira gutanga ibihano, abaturage bazabanza gusobanurirwa ibikubiye muri iri tegeko kugira ngo bamenye inshingano zabo n’ingaruka zo kutaryubahiriza.
Abahinzi bazajya bakurikiranwa n’inzego z’ibanze, ari na zo zizagenzura niba amabwiriza yubahirizwa. Mu gihe hari utemeranya n’igihano yahawe, azaba afite uburenganzira bwo kujurira hakurikijwe amategeko.
Ibihano biteganyijwe birimo amande, azajya agenda yiyongera ku bahinzi bazakomeza gusubira mu makosa.
Iri tegeko rihuzwa n’intego zo kongera umusaruro w’ubuhinzi
Iri tegeko rije mu gihe u Rwanda rwihaye intego yo kongera umusaruro w’ubuhinzi ku kigero cya 50% bitarenze mu mwaka wa 2029, nk’uko biteganywa muri Gahunda ya Kabiri yo Kwihutisha Iterambere (NST2).
Intego ni uko igihugu kizabasha kwihaza mu biribwa bikomoka ku bihingwa byatoranyijwe, ndetse hakaboneka n’ibisagurirwa amasoko yo mu gihugu no hanze yacyo.
Abasesenguzi mu buhinzi bavuga ko kugera kuri iyo ntego bizasaba ko habaho ubuhinzi bukorwa mu buryo burengera ubutaka, bukoresha ikoranabuhanga kandi bukurikiza amabwiriza yashyizweho.
Bongeraho ko kurinda ubutaka ari imwe mu nzira z’ingenzi zo guhangana n’ingaruka z’imihindagurikire y’ibihe no gukomeza kongera umusaruro w’ubuhinzi mu gihe kirekire.
Izindi nkuru:
Leta ihangayikishijwe n’akazi, urubyiruko rwo ruhugiye mu buzima bwo kwinezeza mu mibonano mpuzabitsina
Inteko Ishinga Amategeko yatangiye ingendo zo kugenzura umusaruro w’ubuhinzi
Ishoramari mu Buhinzi Riracyari Rito, BRD Isaba Kongera Inkunga Ihabwa Abahinzi
Jose Chameleon yashyize aravuga nyuma yo kwanga kuvugisha itangazamakuru
The Ben agiye guhurira ku rubyiniro na Green P
Umuhanzi Yago ntameranye neza n’umugore we nyuma yo kwibaruka imfura yabo
U Rwanda rwiyemeje kongera ikoranabuhanga mu Ishuri Rikuru rya Gisirikare
Intambwe nshya mu ruganda rw’ubuhanzi: Ibarura rizagaragaza abahanzi n’impano nshya mu gihugu
Diamond yatangaje ko yishimiye igitaramo The Ben yakoreye Kampala
BRD yegereje abaturage inguzanyo zihendutse binyuze muri SACCO zo hirya no hino mu gihugu