Minisiteri y’Uburezi (MINEDUC) irafungura ku mugaragaro ibikorwa by’ibizamini ngiro by’umwaka w’amashuri wa 2025/2026 kuri uyu wa Gatatu, tariki ya 3 Kamena. Minisiteri y’Uburezi (MINEDUC) iratangiza ku mugaragaro ibizamini ngiro by’umwaka w’amashuri wa 2025/2026 kuri uyu wa Gatatu, tariki ya 3 Kamena 2026, mu muhango uteganyijwe gutangira saa mbiri n’igice za mu gitondo. Ibi bizamini bizakomeza gukorwa kugeza ku wa 22 Kamena 2026.
Minisitiri w’Uburezi, Joseph Nsengimana, azatangiriza ibi bizamini kuri St Joseph Integrated Technical College mu Karere ka Nyarugenge, mu gihe Umunyamabanga wa Leta muri MINEDUC, Irere Claudette, azabifungurira kuri Kagarama Secondary School mu Karere ka Kicukiro.
Abakandida 74,085 ni bo biteganyijwe ko bazakora ibi bizamini, barimo abanyeshuri 70,504 biga mu mashuri ndetse n’abakandida bigenga 3,581. Ibizamini bizakorerwa mu bigo 854 byo hirya no hino mu gihugu, bikazagenzurwa n’abagenzuzi 8,484.
Ibizamini ngiro by’Igihugu biri mu nkingi z’ingenzi z’integanyanyigisho n’isuzumabumenyi bishingiye ku bushobozi, aho bikoreshwa mu gupima ubushobozi bw’abanyeshuri mu bikorwa ngiro, ubumenyi bw’umwuga, imyitwarire n’ubumenyi rusange, hagamijwe kureba uko bashobora gushyira mu bikorwa ibyo bize.
Bizakorwa n’abanyeshuri bo mu mashuri yisumbuye y’imyuga n’ubumenyingiro (TSS), amashuri nderabarezi (TTC), gahunda y’ubuforomo bw’ibanze (ANP), ishami ry’ibaruramari (ACC), ndetse n’abakora isuzuma rishingiye ku mishinga ya siyansi mu mashuri rusange (Science Project-Based Assessment – PBA).
MINEDUC yatangaje kandi ko, uretse ibikorwa byo gutangiriza ibizamini i Nyarugenge no muri Kicukiro, abayobozi bakuru bayo n’ab’ibigo biyishamikiyeho bazanasura banatangizirize ibi bizamini mu bindi bigo byatoranyijwe mu turere dutandukanye tw’igihugu.
Izindi nkuru:
Aegis Trust yahuguye abarenga 6000 ku burezi bwimakaza amahoro mu Rwanda
Abarenga 3,500 basoje ikiciro cya Kaminuza muri RP
Kaminuza zo muri Afurika zikomeje kuyoboka AI, iza Leta ziri imbere mu kuyikoresha
Abanyeshuri icumi bagiye guhagararira u Rwanda muri Amerika mu irushanwa ry’ikoranabuhanga
“Study Now, Pay Later” Ishobora Guhindura Ubuzima bw’Urubyiruko Rutabona Amafaranga yo Kwiga Kaminuza
Ibitabo byinshi birimo kuborera mu bubiko mu gihe amashuri amwe akibura ibyo kwigishirizamo