Kibeho irimo kwagura amacumbi mashya ategerejweho gukemura ikibazo cy’abakerarugendo baburaga aho barara

Mu gihe ubukerarugendo bushingiye ku iyobokamana bukomeje kwiyongera mu Karere ka Nyaruguru, by’umwihariko ku Butaka Butagatifu bwa Kibeho, ubuyobozi bw’akarere ku bufatanye n’abikorera n’inzego z’amadini bukomeje gushora imari mu bikorwa by’amacumbi hagamijwe gukemura ikibazo cy’abashyitsi bajyaga babura aho bacumbika.

Kibeho izwi ku rwego mpuzamahanga kubera amabonekerwa ya Bikira Mariya yemejwe na Kiliziya Gatolika, ikomeje kwakira umubare munini w’abakerarugendo n’abasura baza mu bikorwa by’iyobokamana baturutse mu Rwanda no mu bindi bihugu.

Imibare y’Akarere ka Nyaruguru igaragaza ko abasura Kibeho bageze kuri miliyoni 1.2 buri mwaka, mu gihe amacumbi yari asanzwe ahari atabashaga kwakira uwo mubare uko bikwiye. By’umwihariko mu minsi mikuru y’iyobokamana irimo iya tariki ya 15 Kanama n’iya 28 Ugushyingo, usanga bamwe mu basura Kibeho bahatinda cyangwa bagacumbika mu buryo butanoze kubera ubuke bw’amacumbi.

Amahoteli mashya agiye kongera ubushobozi bwo kwakira abashyitsi

Mu rwego rwo gushakira umuti iki kibazo, ibikorwa byo kubaka no kwagura amahoteli birarimbanyije i Kibeho. Muri ayo macumbi harimo Hotel Kibeho yubatswe na Diyosezi Gatolika ya Gikongoro, iri kugana ku musozo w’imirimo yo kuyubaka.

Iyi hoteli ifite ibyumba 36 kandi yubakwa ku gishoro kirenga miliyari 2.2 Frw. Biteganyijwe ko izatanga serivisi zigezweho zizafasha kongera ubushobozi bwo kwakira abakerarugendo basura Kibeho.

Hari kandi Regina Pacis Hotel y’Abenebikira iri mu mishinga minini yo kwagura amacumbi muri aka gace. Iyi hoteli yongeweho ibyumba 46 bishya ndetse na dortoirs zifite ubushobozi bwo kwakira abantu barenga 120 icyarimwe.

Nyuma yo kwagurwa, Regina Pacis Hotel izashobora kwakira abantu bagera kuri 300 icyarimwe, ibintu bitegerejweho kugabanya cyane ikibazo cy’ababuraga aho bacumbika.

Abasura Kibeho bakomeje kwiyongera

Umwenebikira Umutesi Marie Emilienne ukorera muri Regina Pacis Hotel yavuze ko icyemezo cyo kwagura iyi hoteli cyafashwe nyuma yo kubona umubare munini w’abasura Kibeho baburaga aho barara.Yasobanuye ko hari benshi bajyaga basubira inyuma cyangwa bagacumbika mu buryo butajyanye n’umutekano n’ihumure by’umushyitsi.

Ati: “Twifuje kongera ubushobozi kugira ngo abaza i Kibeho babone aho bacumbika heza kandi hajyanye n’ubushobozi bwabo. Dufite n’ibyumba bishobora kwakira abantu benshi icyarimwe kugira ngo n’amatsinda y’abasenga cyangwa abanyamisiyoneri babone serivisi ziboroheye.”

Yongeyeho ko ubukerarugendo bushingiye ku iyobokamana bukomeje gutanga amahirwe menshi y’ishoramari, asaba n’abandi bashoramari kureba amahirwe ari muri uru rwego.

Ubuyobozi bushimangira ko hakenewe andi macumbi

Umuyobozi w’Akarere ka Nyaruguru, Dr Emmanuel Murwanashyaka, yavuze ko nubwo ibikorwa biri gukorwa bizatanga umusanzu ukomeye, hakiri urugendo rwo kongera amacumbi ahagije ajyanye n’umubare w’abasura Kibeho.

Yagaragaje ko uretse amahoteli ari hafi kuzura, hari n’andi mahoteli ndetse na guest houses biri kubakwa cyangwa biri mu byiciro byo gushaka ibyangombwa.

Ati: “Intego ni ugukomeza kongera ubushobozi bwo kwakira abashyitsi no gutuma Kibeho iba ahantu hagezweho mu kwakira abakerarugendo. Turasaba abikorera n’abafatanyabikorwa gukomeza gushora imari muri uru rwego kuko rufite amahirwe menshi.”

Yongeyeho ko serivisi nziza ari kimwe mu bizatuma abasura Kibeho bakomeza kuhagaruka no kuhagira ahantu nyaburanga kandi hizewe ku rwego mpuzamahanga.

Kibeho iragana ku rwego rushya rw’ubukerarugendo

Kugeza ubu, Kibeho yari ifite amacumbi ashobora kwakira abantu bagera kuri 210 gusa. Amahoteli mashya ari kubakwa n’ari kwagurwa azatuma uwo mubare wikuba hafi gatatu, bikazamura ubushobozi bwo kwakira abasura aka gace.

Abasesenguzi mu rwego rw’ubukerarugendo bavuga ko kwiyongera kw’ishoramari mu macumbi bizafasha Nyaruguru kungukira cyane ku bukerarugendo bushingiye ku iyobokamana, bwamaze kuba imwe mu nkingi z’ubukungu bw’akarere.

Mu gihe ibikorwa byinshi bikomeje gushyirwa mu bikorwa, Kibeho ikomeje kwiyubaka nk’icyerekezo gikomeye cy’abakerarugendo bo mu Rwanda no ku rwego mpuzamahanga, aho abahagana bazarushaho kubona serivisi zinoze kandi zijyanye n’ibipimo by’ubukerarugendo bugezweho.