Ibitabo byinshi birimo kuborera mu bubiko mu gihe amashuri amwe akibura ibyo kwigishirizamo

Raporo nshya y’Urwego rw’Umugenzuzi Mukuru w’Imari ya Leta yagaragaje ibibazo bikomeje kugaragara mu micungire y’ibitabo by’amasomo mu mashuri yo mu Rwanda, aho ibitabo byinshi biguma mu bubiko igihe kirekire mu gihe hari amashuri avuga ko adafite ibikoresho bihagije byo kwifashisha mu myigishirize.

Iyi raporo igaragaza ko nubwo Leta yashoye amafaranga menshi mu kugura ibitabo byagenewe amashuri y’inshuke, abanza n’ayisumbuye, imikoreshereze yabyo ikiri hasi cyane.

Mu igenzura ryakorewe mu mashuri atandukanye, hagaragaye ko ibitabo byinshi byagenewe amasomo arimo Ikinyarwanda, Icyongereza n’Imibare bidakoresha uko bikwiye, bamwe mu barimu n’abanyeshuri bakaba bavuga ko hari aho biba bitarabageraho kandi biri mu bubiko.

Raporo yerekana ko mu myaka itatu ishize hatanzwe ibitabo birenga miliyoni eshatu, ariko amashuri menshi ntiyabashije kubibyaza umusaruro uko byari biteganyijwe.

Hari ibitabo byagenewe abarimu b’amashuri y’inshuke byamaze amezi menshi mu bubiko bitaratangwa, ndetse n’ibindi byagenewe amashuri abanza n’ayisumbuye bikomeza gutinda kugera aho bikenewe.

Mu mashuri y’imyuga n’ubumenyingiro na ho hagaragaye ikibazo cy’uko ibitabo byateguwe bifasha abarimu mu kwigisha bititabwaho cyangwa ntibikoreshwe, nubwo byashyizwe ku mbuga z’ikoranabuhanga.

Umugenzuzi Mukuru w’Imari ya Leta yavuze ko ibi bibazo bishobora kugira ingaruka ku ireme ry’uburezi, kuko abanyeshuri badahabwa ibikoresho bihagije bibafasha mu myigire yabo ya buri munsi.

Yagaragaje kandi ko hakenewe uburyo buhamye bwo gukurikirana isaranganywa n’imikoreshereze y’ibitabo kugira ngo amafaranga ashorwa mu burezi atange umusaruro ugaragara.

Abasesenguzi mu burezi bavuga ko ibitabo ari kimwe mu bikoresho by’ingenzi mu kongera ubumenyi bw’abanyeshuri, bityo ko kubura gahunda ihamye yo kubigeza ku mashuri no kubikoresha neza bishobora kudindiza intego yo kuzamura ireme ry’uburezi mu gihugu.

Mu myanzuro yatanzwe, inzego zishinzwe uburezi zasabwe kunoza uburyo bwo gukwirakwiza ibitabo no kugenzura niba bikoreshwa uko bikwiye, kugira ngo abanyeshuri n’abarimu babashe kubyungukiramo uko bikwiye.