Sobanukirwa Impamvu Umuntu adashobora Kurohama mu Nyanja ya "Dead Sea"

Mu bice bitandukanye by’Isi bikurura ba mukerarugendo, Dead Sea iri mu hantu hihariye kubera ikintu gitangaza benshi: umuntu uyinjiyemo ntarohama nk’uko biba mu zindi nyanja.

Abenshi babibona mu mafoto agaragaza abantu baryamye hejuru y’amazi basoma ibinyamakuru cyangwa bakoresha telefone, bakibaza niba biterwa n’ubuhanga bwo koga. Nyamara, impuguke zisobanura ko ibi bifite ishingiro rya siyansi.

Dead Sea itandukaniye he n’izindi nyanja?

Dead Sea iherereye hagati ya Jordan na Israel, ikaba izwi nk’imwe mu nyanja zifite umunyu mwinshi cyane ku Isi. Bikavugwa ko uwo munyu ari wo utuma amazi yayo atandukana n’ay’izindi nyanja.

Mu gihe inyanja nyinshi zibamo umunyu muke, amazi ya Dead Sea yo afite umunyu mwinshi ku buryo uburemere bwayo bwiyongera cyane. Iyo umuntu ayinjiyemo, ayo mazi amusunika hejuru aho kumureka ngo arohame.

Siyansi isobanura ite iki gitangaza?

Abahanga mu bya siyansi bavuga ko icyo ari cyo bita buoyancy, aho amazi aremereye arusha uburemere umubiri w’umuntu, bikawufasha gukomeza kureremba nta mbaraga nyinshi akoresheje.Ni yo mpamvu n’umuntu utazi koga ashobora kuguma hejuru y’amazi ya Dead Sea igihe kinini, bitandukanye n’ibiba mu zindi nyanja cyangwa mu biyaga bisanzwe.

Ese kogamo bifite umutekano?

Nubwo kurohama muri Dead Sea biba bigoye, ntabwo abantu basabwa kogamo nk’uko boga mu zindi nyanja.

Amazi yayo arimo umunyu mwinshi cyane ku buryo ashobora gutera uburibwe bukomeye iyo yinjiye mu maso, mu kanwa cyangwa ku ruhu rufite ibikomere.

Ni yo mpamvu abasura iyi nyanja basabwa kureremba gusa, bakirinda kuyanywa cyangwa kuyoga mu maso.

Kuki yitwa “Dead Sea”?

Undi mwihariko wa Dead Sea ni uko umunyu mwinshi uyirimo utuma amafi n’ibindi binyabuzima byinshi byo mu mazi bidashobora kuyibamo.

Ibi ni byo byatumye yitwa “Inyanja Yapfuye“, kuko idafite ubuzima bwo mu mazi nk’ubusanzwe bugaragara mu zindi nyanja.

Ni kimwe mu bice bikurura ba mukerarugendo benshi

Nubwo idafite ubuzima bwinshi bwo mu mazi, Dead Sea ikomeje kuba kimwe mu bice bikurura ba mukerarugendo benshi buri mwaka.

Abenshi bajyayo bashaka kwibonera uburambe bwo kureremba ku mazi no kugerageza ibyondo byayo, bikunze kuvugwaho kugira akamaro mu kwita ku ruhu.

Impuguke zishimangira ko ibanga ryose riri muri Dead Sea rishingiye ku miterere kamere yayo, aho umunyu mwinshi utuma amazi aremera cyane kurusha amazi asanzwe.

Ni yo mpamvu umuntu ashobora kureremba bitamusabye gukoresha imbaraga nyinshi, ibintu byatumye Dead Sea iba imwe mu nyanja zidasanzwe kandi zikomeje gutangaza abantu bo hirya no hino ku Isi.