Rubavu yashyizeho ingamba zikomeye nyuma y’icyorezo cya ‘Ebola’ kiri muri Goma

Ubuyobozi bw’Akarere ka Rubavu bwatangaje ko bwashyizeho ingamba zikomeye zigamije gukumira icyorezo cya Ebola nyuma y’uko hagaragaye abarwayi muri Goma no mubindi bice bimwe bya Repubulika Iharanira Demokarasi ya Congo.

Ni imyanzuro yafatiwe mu nama yabaye kuri uyu wa 17 Gicurasi 2026, yahuje abayobozi bo ku rwego rw’Intara, Ikigo cy’Igihugu cy’Ubuzima (Rwanda Biomedical Centre), ubuyobozi bw’Akarere, ibitaro ndetse n’imirenge ikora ku mupaka.

Imipaka ya Rubavu na Goma yafunzwe

Mu myanzuro yafashwe harimo gufunga by’agateganyo imipaka yemewe ihuza Gisenyi na Goma, mu rwego rwo gukumira ikwirakwira ry’icyorezo cya Ebola.

Ibi bije bikurikira amakuru yari yatangajwe mbere ko imipaka ya Petite Barrière, Grande Barrière ndetse n’uwa Kabuhanga yafunzwe mu rwego rwo kurinda abaturage.

Ubuyobozi bwavuze ko iki cyemezo kigamije gushyira imbere ubuzima bw’abaturage no gukomeza gukaza ingamba zo kwirinda Ebola.

Inzira zitemewe zafunzwe burundu

Abayobozi banemeje ko abaturage banyuraga mu nzira zitemewe hagati y’u Rwanda na RDC bagomba guhagarikwa burundu.

Hashyizweho irondo ridasanzwe ku mupaka rikora ku manywa na nijoro, rigamije gukurikirana abashobora kugerageza kwinjira cyangwa gusohoka mu gihugu banyuze mu nzira zitemewe.

Abaturuka muri DRC bazajya babanza muri “Quarantine”

Mu rwego rwo gukaza ubwirinzi, Abanyarwanda bari muri RDC bemerewe gutaha ariko bagomba kubanza gukorerwa ibizamini ku mupaka ndetse bakanyuzwa muri quarantine mbere yo kwinjira mu gihugu.

Quarantine ni uburyo bwo gushyira umuntu ahantu hihariye mu gihe runaka kugira ngo bakurikirane niba afite indwara yandura cyangwa atarayandura, cyane cyane iyo yavuye ahantu hari icyorezo.

Ku rundi ruhande, Abanye-Congo bari mu Rwanda bemerewe gusubira iwabo. Ubuyobozi bwavuze ko abaganga bashinzwe gusuzuma abantu (screening) bamaze koherezwa ku mipaka yose ikora muri aka karere.

Hashyizweho ahantu ho kwakirira abakekwaho Ebola

Mu Murenge wa Rugerero hatangijwe ahantu hihariye ho kwakirira abantu bakekwaho kuba bafite ibimenyetso bya Ebola, hagamijwe kubatandukanya n’abandi mu rwego rwo kwirinda ko icyorezo cyakwirakwira.

Hanatangiye ibikorwa byo gushyiraho ubukarabiro ku mipaka yose ndetse no gukaza isuku mu bice byegeranye n’umupaka.

Abaturage baturiye umupaka bagiye gukorerwa ubukangurambaga

Ubuyobozi bwatangaje ko bugiye gukora ubukangurambaga bwihutirwa ku baturage batuye hafi y’umupaka kugira ngo basobanukirwe uburyo bwo kwirinda Ebola ndetse n’impamvu y’izi ngamba zafashwe.

Abaturage basabwe kwirinda kwegera abantu bafite ibimenyetso bikekwaho Ebola birimo umuriro ukabije, gucika intege, kuruka no kuva amaraso.

Hafunguwe “Command Post”

Mu rwego rwo gukurikirana uko ingamba zishyirwa mu bikorwa, hafunguwe Command Post izajya ikurikirana ibikorwa byose byo gukumira icyorezo no guhuza inzego zose ziri gukora muri iki gikorwa.

Ubuyobozi bw’Akarere ka Rubavu bwatangaje ko izi ngamba zatangiye gushyirwa mu bikorwa ako kanya kandi ko abaturage basabwa gukomeza gukorana n’inzego z’umutekano n’iz’ubuzima mu guhangana n’iki cyorezo.

Umwanditsi: CYIZA Theogene