Kunyara kenshi udatwite bishobora kuba ikimenyetso cya diabete n’izindi ndwara zikomeye

Kunyara kenshi ni kimwe mu bibazo abantu benshi bahura na byo mu buzima bwa buri munsi, nyamara hari igihe biba ikimenyetso cy’indwara zitandukanye zikeneye kwitabwaho n’abaganga. Abahanga mu by’ubuzima bagaragaza ko umuntu unyara cyane kandi adatwite akwiye kwisuzumisha hakiri kare kugira ngo hamenyekane icyaba kibitera.

Kimwe mu bishobora gutera kunyara kenshi ni indwara ya diabete. Iyo umuntu afite isukari nyinshi mu maraso, umubiri ugerageza kuyisohora binyuze mu nkari, bikaba byatuma agenda kenshi mu bwiherero. Ibi kandi akenshi biherekezwa n’inyota idasanzwe, cyane cyane nijoro.

Ubwandu bwo mu nzira z’inkari bushobora kuba intandaro

Kwandura mu nzira z’inkari ni indi mpamvu ishobora gutuma umuntu ahora yumva ashaka kwihagarika. Iyo ubu bwandu bwibasiye uruhago cyangwa indi myanya inyuramo inkari, umuntu ashobora kujya anyara kenshi kandi akumva ububabare cyangwa uburyaryate igihe yihagarika.

Hari n’igihe ibibazo by’impyiko cyangwa uruhago rukora cyane bituma umuntu ahora yumva akeneye kujya kwihagarika nubwo inkari zaba ari nke. Ibi biterwa n’uburyo uruhago rwohereza ubutumwa ku bwonko ko rwuzuye kandi atari ko bimeze.

Fibroids n’imisemburo bishobora kugira uruhare

Ku bagore, ibibyimba byo mu mura bitari kanseri bizwi nka fibroids bishobora gukura bikegera uruhago, bikarushyiraho igitutu. Ibyo bituma umuntu ahora yumva ashaka kunyara.Abahanga kandi bagaragaza ko ihindagurika ry’imisemburo rishobora kugira uruhare mu gutuma umuntu anyara kenshi, cyane cyane ku bagore bari mu byiciro bitandukanye by’imihindagurikire y’umubiri.

Ibyo unywa n’imiti ufata bishobora kubigiramo uruhare

Ku bagore, ibibyimba byo mu mura bitari kanseri bizwi nka fibroids bishobora gukura bikegera uruhago, bikarushyiraho igitutu. Ibyo bituma umuntu ahora yumva ashaka kunyara.Abahanga kandi bagaragaza ko ihindagurika ry’imisemburo rishobora kugira uruhare mu gutuma umuntu anyara kenshi, cyane cyane ku bagore bari mu byiciro bitandukanye by’imihindagurikire y’umubiri.

Inama zitangwa n’abahanga

Abahanga mu by’ubuzima bagira inama abantu banyara kenshi kutagabanya kunywa amazi kubera gutinya gukomeza kujya mu bwiherero, kuko bishobora gutuma umubiri ukama. Ahubwo basabwa kunywa amazi ahagije no kwirinda kunywa ibintu byinshi mbere y’amasaha yo kuryama.

Banashimangira ko umuntu ubona ikibazo cyo kunyara kenshi gikomeje cyangwa kikajyana n’ibindi bimenyetso nk’ububabare, umuriro cyangwa inyota ikabije, akwiye kwihutira kugana kwa muganga. Ibizamini by’inkari n’amaraso bishobora gufasha kumenya ikibazo nyakuri no gutangira kuvurwa hakiri kare.

Kwisuzumisha igihe ni imwe mu nzira zifasha gukumira ingaruka z’indwara zitandukanye zishobora kwigaragaza binyuze mu kimenyetso cyo kunyara kenshi.