Muri Mali: Hafunguwe Ikigo Mpuzamahanga cy’Abakora Imigenzo Gakondo

Mu Murwa Mukuru wa Mali, Bamako, hafunguwe ikigo cyiswe Centre de Sorcellerie de Bamako, cyatangajwe nk’ikigo mpuzamahanga kigamije guhuza abantu bavuga ko bafite ubumenyi bwa gakondo burimo ubupfumu n’ibindi bikorwa bifitanye isano n’imigenzo gakondo.

Amakuru yatangajwe na televiziyo yo muri Mali agaragaza ko iki kigo cyafunguwe mu nyubako y’igorofa nyinshi, kikazajya cyakira abantu bo mu bihugu bitandukanye bya Afurika bavuga ko bakora ibikorwa bifitanye isano n’ubumenyi bwa gakondo.

Mu kiganiro cyanyuze kuri iyo televiziyo, hagaragaye amagambo agira ati: “La sorcellerie sort du noir”, bisobanura ko ibikorwa by’ubupfumu n’uburozi bigamije gukorerwa mu mucyo aho gukomeza gufatwa nk’ibikorerwa mu ibanga.

Intego y’ikigo

Uwatanze igitekerezo cyo gushinga iki kigo, Professeur Mamadou Baboud Diang, uvugwa nk’Umuyobozi w’Inama Nyafurika y’Abafite Ubumenyi Bwa Gakondo (President des Réseaux des Détenteurs des Savoirs Occultes Africains), yavuze ko intego ari ugushyiraho urubuga ruhuza abakora iyi myuga, bakayikora bisanzuye kandi batikanga.

Yavuze ko iki kigo kizafasha abantu bavuga ko bafite ubumenyi bwa gakondo guhura, kungurana ibitekerezo no gusigasira ibyo bita umurage wabo.

Impaka zishobora kuvuka

Gufungura iki kigo bishobora gukomeza gutera impaka bitewe n’uko imyumvire ku bupfumu n’uburozi itandukanye cyane hagati y’ibihugu, amadini n’imico. Hari ababifata nk’umurage ndangamuco cyangwa imyemerere gakondo, mu gihe abandi babifata nk’ibintu bidakwiye gushyigikirwa.

Kugeza ubu, ubuyobozi bwa Mali ntiburatangaza amakuru arambuye ku rwego rw’amategeko iki kigo kizakoraho cyangwa inshingano zihariye kizaba gifite.

Aya makuru yatangajwe bwa mbere na Kigali Today, ishingiye ku nkuru ya televiziyo yo muri Mali.