Perezida Kagame yasabye ko Ikinyarwanda kirushaho kwigishwa mu nzego z’umutekano

Perezida Paul Kagame yasabye ko Ikinyarwanda kirushaho guhabwa umwanya mu mahugurwa ahabwa abasirikare n’abapolisi, agaragaza ko gukoresha neza ururimi rw’Igihugu ari imwe mu nkingi zo kubungabunga umuco n’indangagaciro z’Abanyarwanda.

Yabitangaje kuri uyu wa 28 Nyakanga 2026 ubwo yaganiraga n’Intore 769 zigize icyiciro cya 16 cy’Indangamirwa, ziri gutozwa mu Kigo cy’Imyitozo cya Gabiro giherereye mu Karere ka Gatsibo.

Mu kiganiro cye, Perezida Kagame yashimye intambwe Intore zimaze gutera mu kwiga no kuvuga Ikinyarwanda, avuga ko urubyiruko rufite amahirwe yo kwiga no kumenya ururimi vuba kurusha bamwe mu bakuze batagize ayo mahirwe.

Yashimangiye ko urubyiruko rukwiye gukomeza kwiga Ikinyarwanda, anasaba ko hakongerwa uburyo bw’ikoranabuhanga bwafasha abakiri bato kugikurikira no kukimenyereza aho baba bari hose.

Perezida Kagame yanasabye ubuyobozi bw’Ingabo z’u Rwanda (RDF) n’ubwa Polisi y’u Rwanda (RNP) gushyira imbaraga mu kwigisha no guteza imbere ikoreshwa ry’Ikinyarwanda mu kazi ka buri munsi.

Yavuze ko nubwo kumenya indimi z’amahanga ari ingenzi, bitagomba gutuma Abanyarwanda birengagiza ururimi rwabo kavukire cyangwa bakarukoresha nabi.

Mu butumwa bwe, yanagaragaje ko ururimi ari kimwe mu biranga ubwenegihugu n’umuco, bityo buri Munyarwanda akwiye kurwitaho no kuruvuga neza.

Perezida Kagame yashimye kandi imyitwarire y’Intore z’Indangamirwa, azishishikariza gukomeza kuba urugero rwiza mu kubungabunga umuco nyarwanda, gukunda igihugu no guteza imbere indangagaciro zihuza Abanyarwanda.

Yasoje asaba urubyiruko gukoresha amahirwe rufite mu kwiga no kwihugura, kugira ngo ruzabashe kugira uruhare rugaragara mu iterambere ry’Igihugu no gusigasira umurage w’Ikinyarwanda ku bazagikurikira.