Kogosha umusatsi ni kimwe mu bikorwa bisanzwe bikorwa n’abagabo benshi, abagore, ndetse n’abana kugira ngo bagire isuku, bagaragare neza kandi bumve bisanzuye. Hari abogosha buri cyumweru, abandi buri mezi make bitewe n’uburyo bakunda gutunganya imisatsi yabo. Nubwo kogosha bifatwa nk’igikorwa gisanzwe kidateza ikibazo, abahanga mu by’ubuzima bavuga ko bishobora kuba intandaro y’indwara zitandukanye igihe isuku y’ibikoresho idakozwe.
Mu myaka yashize, abantu bakoreshaga cyane imikasi, imashini za cyera n’urwembe mu kogosha. Ubu haje imashini zigezweho kandi zorohereza abakora aka kazi, ariko nubwo ikoranabuhanga ryateye imbere, ikibazo cy’isuku kiracyari ingorabahizi zimwe muri salon zikora akazi ko kogosha imisatsi.
Ibikomere bito bishobora guteza ubwandu
Iyo umuntu yogoshwa, hari igihe habaho udukomere duto cyane tudahita tuboneka. Imashini cyangwa urwembe bishobora gukuraho uruhu ruto cyane umuntu atanabizi. Abahanga bavuga ko ibyo bikomere bishobora gutuma mikorobe zinjira mu mubiri, cyane cyane iyo ibikoresho byakoreshejwe bidasukuye neza cyangwa byarakoreshe ku wundi muntu urwaye.
Indwara z’uruhu zishobora kwandurira muri salon
Abaganga bavuga ko zimwe mu ndwara zikunze kwandurira mu kogosha ari izifata uruhu rwo ku mutwe. Hari igihe umuntu ashobora kugira ibisebe, uduheri cyangwa ubushye bukabije nyuma yo gukoresha ibikoresho byanduye.
Indwara y’ibihara ishobora gukwirakwira vuba
Indwara y’ibihara yo ku mutwe iri mu zikunze gufata abantu bakoresha ibikoresho bihuriyeho. Iyi ndwara ituma umuntu agira ibisebe cyangwa ubushye ku mutwe, rimwe na rimwe umusatsi ugatangira gucika aho ikibazo kiri.
Hepatitis ishobora kwandurira mu bikoresho byanduye
Abahanga mu by’ubuzima bavuga ko indwara zimwe zifata umwijima nka Hepatitis zishobora kwandurira mu maraso igihe ibikoresho byo kogosha byakoreshejwe ku muntu urwaye bitasukuwe neza.
Hari n’ibyago byo kwandura VIH/SIDA
Nubwo bidakunze kubaho cyane, abaganga bavuga ko gukoresha urwembe rumwe ku bantu benshi bishobora gutera ibyago byo kwandura VIH/SIDA igihe habayeho gukomeretsanya.
Isuku nke muri salon ishobora guteza ibibazo byinshi
Hari salon zimwe usanga zidakurikiza amabwiriza y’isuku uko bikwiye. Hari aho igitambaro kimwe gihanaguza abantu benshi, cyangwa imashini zigakomeza gukoreshwa umunsi wose zidasukuwe.
Uburyo bwo kwirinda izi ndwara
Abantu basabwa kujya bahitamo salon zifite isuku kandi zubahiriza amabwiriza y’ubuzima. Ni byiza kureba niba imashini zogosha zisukurwa nyuma ya buri mukiliya ndetse niba abakozi bakaraba intoki.
Hari kandi abantu bahitamo kugira imashini zabo bwite cyangwa urwembe rwabo kugira ngo bagabanye ibyago byo kwandura. Ababyeyi nabo bagirwa inama yo kwitondera cyane aho bogoshera abana babo.
Kwirinda kogosha ahari ibisebe cyangwa ku ruhu rwangiritse na byo ni ingenzi kuko byorohereza mikorobe kwinjira mu mubiri.
Isuku ni ingenzi mu kwirinda uburwayi
Nubwo kogosha umusatsi ari igikorwa gisanzwe kandi gifitiye benshi akamaro, kutita ku isuku bishobora guteza ibibazo bikomeye by’ubuzima. Gukoresha ibikoresho bisukuye neza no kwitondera aho umuntu yogoshera ni imwe mu nzira zifasha kwirinda indwara zishobora guterwa no kogoshwa nabi.
Izindi nkuru:
Mu Bwongereza: Cancer y’uruhu ikomeje guteza impungenge.
Ise: Indwara y’uruhu ifata benshi ariko ikaba ivurwa igakira
Sobanukirwa ibimenyetso simusiga byakwereka ko uri kugira isukari nyinshi mu mubiri
Impamvu Abaganga Bashishikariza Abantu Gukora Imyitozo Ngororamubiri .
Kuki kugabanya amabere biri kurushaho kwamamara muri iki gihe?
Akamaro ko Kunywa Amazi Mu Buzima bwa Buri Munsi.
RDC: Abarwayi ba Ebola batorotse ibitaro bya Rampara
RCS yahakanye indwara y’Iseru mu Igororero rya Nyarugenge
Batatu bamaze guhitanwa na Hantavirus yagaragaye mu bwato bw’ubukerarugendo.
Menya indwara zitandukanye zifata ‘Prostate’ n’uburyo wakwirinda