Kubura ibitotsi kenshi bishobora kuba ikimenyetso cy’ibibazo bikomeye ku buzima

Abantu benshi bashobora gutekereza ko kubura ibitotsi ari ikibazo gisanzwe giterwa n’umunaniro, akazi kenshi cyangwa gukoresha telefone nijoro. Icyakora, ubushakashatsi bushya bwagaragaje ko abantu bafite iki kibazo bashobora kuba bafite ibyago byinshi byo guhura na bimwe mu bibazo bikomeye by’ubuzima.

Abashakashatsi bo muri Autriche, u Budage, u Butaliyani n’u Busuwisi basesenguye ibyavuye mu bushakashatsi bwakorewe ku bantu babarirwa muri za miliyoni bo mu bihugu bitandukanye, nk’uko ABC News yabitangaje.

Muri ubwo bushakashatsi, abashakashatsi basanze abantu bafite ikibazo cyo kubura ibitotsi bafite ibyago byo kurwara stroke biri hejuru ku kigero cya 26% ugereranyije n’abatari bafite icyo kibazo.

Basanze kandi ibyago byo kujyanwa mu bitaro kubera impamvu zitandukanye byari hejuru ho hafi 30% ku bantu bafite ikibazo cyo kubura ibitotsi.

Kubura ibitotsi bigaragara gute?

Kubura ibitotsi ntibigarukira gusa ku kutabasha gusinzira. Bishobora no kugaragazwa no gukanguka kenshi mu ijoro, kugira ikibazo cyo kongera gusinzira cyangwa kubyuka umuntu yumva ataruhutse nubwo yaba yamaze igihe mu buriri.

Iyo ibi bibazo bikomeje kubaho, bishobora kugira ingaruka ku mikorere y’umuntu ku manywa ndetse no ku mibereho ye muri rusange.

Ubushakashatsi bwagaragaje n’isano n’izindi ndwara

Abashakashatsi kandi bagaragaje isano hagati yo kubura ibitotsi n’ibibazo birimo agahinda gakabije, kugerageza kwiyahura ndetse n’indwara zo kwibagirwa zirimo Alzheimer.

Icyakora, hari ikintu cy’ingenzi ubushakashatsi bwashimangiye: ibyavuye muri ubu bushakashatsi ntibihamya ko kubura ibitotsi ari byo bitera izi ndwara.

Ahubwo, mu bantu basuzumwe, ibibazo nk’ibi byagaragaye cyane mu bafite ikibazo cyo kubura ibitotsi. Ni ukuvuga ko umuntu ubura ibitotsi atagomba guhita atekereza ko byanze bikunze azarwara stroke cyangwa Alzheimer.

Icyo umuntu yakora kugira ngo arusheho gusinzira neza

Inzobere zigira abantu inama yo kugira amasaha ahoraho yo kuryama no kubyuka, kuko guhindagura gahunda yo gusinzira kenshi bishobora kugira ingaruka ku mikorere y’umubiri.

Hari n’izindi ngamba zishobora gufasha umuntu kugira ibitotsi byiza, zirimo kugabanya gukoresha telefone cyangwa kureba televiziyo mbere yo kuryama.

Abantu kandi bagirwa inama yo kwirinda kunywa ikawa cyangwa inzoga mu masaha y’ijoro, cyane cyane niba babona ko bibagiraho ingaruka mu gusinzira.

Iyo ikibazo cyo kubura ibitotsi gikomeje cyangwa kigatangira kugira ingaruka ku buzima bwa buri munsi, ni byiza kugisha inama umuganga kugira ngo harebwe icyaba kibitera n’uburyo bwo kugikemura

Gusinzira neza ni ingenzi ku buzima. Kubura ibitotsi rimwe na rimwe ntibisobanuye ko umuntu afite indwara ikomeye, ariko ikibazo gikomeje gusubira cyangwa kumara igihe kirekire ntigikwiye kwirengagizwa.