Ubushinjacyaha bw’u Buholandi bwasabye Urukiko rwa La Haye gukatira Umunyarwanda Eugène Ntambara igifungo cya burundu, bumushinja uruhare muri Jenoside yakorewe Abatutsi mu 1994.
Nk’uko IGIHE yabitangaje, Ntambara w’imyaka 66 yaburanishijwe nyuma y’iperereza ryamaze imyaka myinshi rikozwe n’inzego z’u Buholandi zishinzwe gukurikirana ibyaha mpuzamahanga.
Amakuru yatangajwe na IGIHE agaragaza ko Ntambara yahoze atuye muri Komini Mbazi muri Perefegitura ya Butare, aho yakoraga nk’umwarimu ndetse akanagira inshingano mu buyobozi bw’inzego z’ibanze mbere yo guhungira mu Buholandi nyuma ya Jenoside.
Mu 2014, u Rwanda rwashyizeho impapuro mpuzamahanga zo kumuta muri yombi rusaba ko yoherezwa kuburanira i Kigali. Icyakora, u Buholandi ntibwabimwemereye kubera ko yari amaze guhabwa ubwenegihugu bwabwo.
Mu rwego rwo gukusanya ibimenyetso bihagije, abagenzacyaha b’u Buholandi bageze mu Rwanda mu 2020, bagirana ibiganiro n’abatangabuhamya batandukanye, barimo abarokotse Jenoside n’abakatiwe kubera uruhare bayigizemo.
Ubushinjacyaha buvuga ko ibimenyetso bwakusanyije bugaragaza ko Ntambara yagize uruhare mu bwicanyi bwakorewe Abatutsi bari bahungiye kuri Sitade ya Byiza i Mbazi, aho abarenga 3,000 biciwe hagati ya tariki ya 24 na 25 Mata 1994.
Bumushinja kandi kuba yaragize uruhare mu gusahura no gutwika imitungo y’Abatutsi, gushishikariza abaturage gukora Jenoside ndetse no kugira uruhare mu bikorwa by’ubwicanyi.
Mu iburanisha ryatangiye muri Kamena 2026, Ntambara yahakanye ibyo aregwa byose, avuga ko nta ruhare yagize muri Jenoside ndetse ko na we yapfushije abo mu muryango muri ayo mahano.
Nk’uko IGIHE ibitangaza, Ubushinjacyaha bwasabye urukiko gusanga ibimenyetso bihagije kugira ngo Ntambara ahamwe n’ibyaha byose aregwa, agahanishwa igifungo cya burundu.
Biteganyijwe ko Urukiko rwa La Haye ruzasoma umwanzuro warwo ku wa 28 Kanama 2026, ari bwo hazamenyekana niba Ntambara ahamwa n’ibyaha cyangwa agirwa umwere.
Izindi nkuru:
Kenneth Law yemeye ibyaha byo gufasha abantu kwiyahura
Sky2 dosiye ye yagejejwe mu Bushinjacyaha nyuma yo gutabwa muri yombi
Kuryama mu nzu irimo imbabura yaka: Ingeso ishobora gushyira ubuzima mu kaga
I Ngoma: Abantu bane bakatiwe burundu nyuma yo kwica umubyeyi w’umwe muri bo
U Rwanda Rwanditse Amateka Muri Afurika nyuma yo Guhabwa Icyemezo Mpuzamahanga cya Teleport
Hatangijwe ikoranabuhanga rizafasha kubika no kwibuka amazina y’abazize Jenoside
Leta ihangayikishijwe n’akazi, urubyiruko rwo ruhugiye mu buzima bwo kwinezeza mu mibonano mpuzabitsina
Kabuga Félicien agiye gushyingurwa mu Bubiligi nyuma y’imyaka myinshi ari mu maboko y’ubutabera mpuzamahanga
Ukraine yasutsweho ibisasu nyuma y’amasaha 30 y’agahenge.
Burera: Umekecuru wakubiswe ishoka n’umugabo we aratabaza akarere.